وكالات//

هيئة تنظيم الفضاء الإلكتروني فصين قالت إن لوليدات لي عمرهم قل من 18عام مخصهمش يشدو تلفون كثر من ساعتين فالنهار، حيت التلفون عندو أضرار كثيرة على صحتهم، وتصريح لي دارت الهيئة تسبب فانخفاض أسهم شركات التكنولوجيا.

الهيئة قالت إنها بغات الشركات لي كتصاوب التلفونات دير برامج خاصة بالوليدات الصغار، وتكون قادرة تمنع ݣاع لي قل من 18 عام باش ميدخلوش للأنترنيت ويديرو مابغاو، وتحدد ليهم الوقت لي مخاصهمش يفوتوه.

هاد الأعوام لي فاتت وللاو الوليدات كيشدو تلفون بلا قياس، والسلطات وللات خيفا من هاد القضية حيت بزاف ديال الوليدات نقص ليهم شوف أو ولاو مدمنين على الأنترنيت، دكشي علاش منعاتو عليهم فالمدارس باش يركزو فقرايتهم وتحميهم من هاد الإدمان.