كود ـ كازا//

علنات اليوم تلات شركة فورد ورونو على شراكة استراتيجية باش يطوّرو جوج ديال الطوموبيلات ديال ضو اللي غادي يكونو باسم ماركة فورد، ولي غادي يتصنعو فشمال فرنسا فوق المنصة ديال رونو، هاد الاتفاق كيجي فوسط سباق كبير فالأسواق العالمية على الطاقـة النقية، وكيأكد الرغبة فزيادة الحضور ديالهم فالسوق الأوروبية اللي كاتبدّل بسرعة.

ومتوقع يوصل الموديل اللول ديالها إلى قاعات العرض ف أوائل عام 2028.

وفنفس الإطار، ناويين حتى باش يتعاونو فصناعة طموبيلات تجارية صغيرة ف أوروبا، وهادشي غادي يقدر يخليهم يزيدو الخبرات ديالهم ويطوّرو موديلات جديدة بتكلفة أقل وبجودة أحسن. الرئيس التنفيذي ديال رونو، فرانسوا بروفوست، عبّر على الفرحة ديال الشركة بهاد الشراكة، وقال باللي هاد التعاون غادي يزيد يقوّي القدرة ديالهم على الابتكار ومواجهة التحديات ديال السوق.

أما بالنسبة للمغرب، فهاد الشراكة تقدر تفتح آفاق جديدة، خصوصًا وأن البلاد اليوم ولات مركز صناعي مهم فإفريقيا بفضل المصانع ديال رونو وستيلانتيس فالبيضاء والقنيطرة. أي توسّع فالشراكات الأوروبية فالمجال الكهربائي يقدر يخلق فرص تعاون جديدة، سوا فالتزويد بالبياس، أو نقل التكنولوجيا، أو حتى توسيع الاستثمارات فالإنتاج الكهربائي اللي المغرب كيدير فيه خطوات كبيرة.