وكالات//

تسببات شابة تركية فتعطيل حركة السير، من بعدما وقفات الطوموبيل ديالها فوسط طريق عام فمدينة إسطنبول، وبداّت كترقص لمدة طويلة، الشي اللي خلا الناس يتجمعو، وتدخل البوليس وحتى جا الديباناج باش يجرّو الطوموبيل ويحلّو المشكل.

وبينات بزاف ديال الفيديوهات اللي تصوّرات من طرف المارة والشوافرية اللي توقفو تماك، الشابة وسمّيتها “غيزام”، وهي داخل الطوموبيل كتكمّل الرقص ديالها بلا ما تهتم لنداءات الناس باش تتحرك وتخلي الطريق محلول.

حتى البوليس حضرو للمكان، ولكن بلا فايدة، حيث الشابة (29 عام) ما حلّاتش باب الطوموبيل باش تسمع ليهم، وبقات كترقص على أنغام الموسيقى اللي مشعلاها داخل الطوموبيل ديالها.

من بعد شدوها البوليس، وتبين أنها كتعاني من اضطراب “ثنائي القطب”، للي هو حالة صحية عقلية، وهزوها لسبيطار الأمراض النفسية والعصبية بناءً على قرار من النيابة.