سهام البارودي – كود//
الى كان شي حسنة عند اليوتوب ! بالاضافة لأنه عتق بزاف ديال العائلات من الفقر ! و خلق فرص شغل لبنادم لي بعقلو و حتى الحماق و لي مقطعين الاوراق ! فراه ورا للمغاربة وجهم فالمراية بلا كذوب و بلا نفاق !
سنوات و حنا عايشين على ديك الهضرة الغليضة ديال حنا دولة اسلامية و حنا مجتمع محافظ ! و لي خرج يطالب بشوية ديال الحرية كاينوضو ليه ولاد القحاب من الاسلاميين والداعشيين و حتى من “ولاد الشعب” ! قاليك حنا مجتمع ماكانقبلوش الافطار العلني فرمضان و ماكانقبلوش المثلية و كانعيطو للبوليس الى شفنا شي واحد مدخل صاحبتو و كانعايرو دوزام حيت دوزات السهرة د موازين ديال جينيفر لوبيز ! نفس الشعب لي يقدر يتعدا على مثلي فالزنقة و يسلخ واحد حيت شرب جغمة د الما فرمضان و ينوض قربالة على فيلم الزين لي فيك ! هوا نيت ماعندوش مشكل يمونطي ڤيديو ديال مراتو كاتشقا بسترينغ !
اليوتوب عرا على واحد الحاجة مهمة شحال هادي و المغاربة رافضين يواجهوها هوا انه فاش كادخل للتخت د التخت د العقلية د واحد الفئة مهمة من المغاربة راه ماكايبقا لا اسلام لا تقاليد لا اعراف لا حلال لا حرام لا جنة لا جهنم ! آ الناس بغات البينگة نعام آ سيدي ! الحبة ! عومار ! الگرمومة ! ماتقول ليهم لا حلال لا حرام ! صافي سي فيني دابا بنادم ولا معري على اللاص ! باغي يعيش و ياكل و يشرب و يلبس و يصوگ الحديد و يشري آيفون ! و ديك الهضرة ديال الصبر و الفقراء يدخلون الجنة سير كولها !
و بلا اسلام ! المشكلة راه حتى من الناحية الاخلاقية بنادم ماعندو اخلاق بنادم اوفون كاتلقاه مستاعد يدير اي حاجة واخا تكون حاطة من كرامتو فسبيل الفلوس !
ايه طبعا الفلوس زوينين و وواعرين و لي ماعندو فلوس كلامو مسوس ولكن ماشي لدرجة أم تخرج بنتها تعريها فاليوتوب باش طلع قناتها ! هنا كاتولي المسألة قحبونية محضة ! الادسنس فرش فئة كبيرة ديال المغاربة و فرش النفاق لي كانعيشو بيه و معاه !
