الرئيسية > آش واقع > شحال غادي يجيب المغرب من ڤاكسان وكيفاش غادي يدار وشكون اللي غادي يديرو بالاجبار وشحال الوقت بين الجبلة اللولى والثانية وواش غادية دار كل عام؟ =”كود” جابت ليكم اجوبة على كاع هاد التساؤلات: تفاصيل حصرية
20/11/2020 11:30 آش واقع

شحال غادي يجيب المغرب من ڤاكسان وكيفاش غادي يدار وشكون اللي غادي يديرو بالاجبار وشحال الوقت بين الجبلة اللولى والثانية وواش غادية دار كل عام؟ =”كود” جابت ليكم اجوبة على كاع هاد التساؤلات: تفاصيل حصرية

شحال غادي يجيب المغرب من ڤاكسان وكيفاش غادي يدار وشكون اللي غادي يديرو بالاجبار وشحال الوقت بين الجبلة اللولى والثانية وواش غادية دار كل عام؟ =”كود” جابت ليكم اجوبة على كاع هاد التساؤلات: تفاصيل حصرية

كود احمد الطيب كود ///

المغرب لاعب كبير فقضية الڤاكسان ضد “كورونا فيروس”. موجد كلشي. ايلي منظمة الصحة العالمية قالت باللي دابا كاين 11 ڤاكسان قريب يكون واجد٬ فالمغرب غادي يتعامل مع 3 من هادو. كاين ڤاكسان ديال الصين “سينوفارم”. هادا هو الاكثر تقدما. لقاح كان دار على 600 مغربي وكلهم دوزو المرحلة الثالثة اللي كملات نهار الثلاث اللي فات وفق مصدر ل”كود” بنجاح.

اللقاح الثاني ديال فايزر. حتى هو المغرب داير معاه اتفاق. هادا كيف شفنا فلخبارات غادي مزيان وقريب تسويقو. يمكن فاول العام الجاي. هاد المختبر الامريكي عندو شركة ديالو فالمغرب. ماشي بعيد يولي يتصايب فهاديك الشركة اللي كاينة فالجديدة.

ثم وزارة الصحة المغربية دايرة اتفاق مع ڤاكسان نگليزي غادية ديرو “اوكسفورد”. حتى هو نتائجو مزيانة.

وفق مصدر ل”كود”فاللقاح الصيني بين على نتائج مشجعة بزاف. كاع اللي داروه ليهم فالمغرب نتجو “انتي كور”.

ووفق مصدر “كود” فالمغرب غادي يكون عندو 26 مليون من اللقاح الصيني. هاد الشي خداتو الرباط من السطوك الاستراتيجي ديالها. طبعا نتيجة التعاون بين البلدين

ولكن كيفاش غادي يدار هاد اللقاح؟
وفق مصدر طبي ل”كود” غادي يدار على جوج مرات. بين التلقيح الاول والثاني غادي يكون 28 يوم. هاد الشي غادية تتكلف بيه مراكز صحية اللي فالاحياء وفالعروبيات. اللي قريبة من المواطنين. ناس الصحة من فراملية واطباء اللي كيكونو فهاد المراكز الصحية٬ تضيف مصادر “كود”٬ هما للي غاديين يتكلفو بهاد الشي. وهاد الشي غادي يكون فابور

ولكن واش ممكن يدير المواطن ڤاكسان دلاگريب العادية وڤاكسان ضد كورونا ڤيروس؟ وفق مصدر “كود” طبعا ممكن. غير خاص يكون بيناتهم 21 يوم. اي خاص اللول يكون هو الي ضد الزكام عاد يتبعو هادا ضد كورونا

ولكن شكون اللي غادي يديرو بالاجبار وشكون اللي يمكن يديرو ويمكن ما يديروش من لمغاربة؟

وفق مصادر “كود” فهادوك اللي فايتين 65 عام وعندهم امراض مزمنة. هادو بزز. حقاش اما هاد الفاكسان ولا نسبة يفلتو من الموت قليلة ايلى ضرباتهم “كورونا”. كاين طبعا اللي كاع فالواجهة من نهار بدات هاد الجايحة. فالصف الاول فالصف الاول.

ولكن اللي ما بين 18 عام و65 عام وما بغاش يديرو يتحمل مسؤوليتو وهادا من حقو. غير ايلى فات الوقت يدبر على راسو. حتى الثمن ايلى بغى يشريه مازال ما تحددش.

الحاجة اللي غادية تصدم كثار هو ان هاد الڤاكسان بحال ديال لاگريب خاصك ديرها كل عام يؤكد مصدر “كود”.

موضوعات أخرى

28/11/2020 22:30

متابعة 4 قضاة بسبب تدوينات ففيسبوك.. نادي القضاة كاعي: هذا استهداف مباشر للنادي والتدوينات قديمة وماكتشكل حتى مساس بالسلطة القضائية أو بالأشخاص.. وهذي مصادرة لحرية القضاة فالتعبير