سهام البارودي- كود
—
كاين شي جرائم و شي شبهات مامعاهمش الضحك خصوصا فالدول لي كاتحتارم راسها و بالنسبة لأي فنان يقدرو نسفوا الصورة ديالو قدام الجمهور و المستشهرين و ماعمرو يحلم يگعد الراس خصوصا لا تعامل مع الأمور بصبيانية! فنان معروف عليه جانكي و عندو ماضي مع المخدرات مستحيل شي ماركة عالمية تربط الصورة ديالها بيه ! و نفس الشيء بالنسبة لفنان متهم فقضايا الاغتصاب و العنف ماغاتعيطش عليه ديور و لا شانيل و لا طويوطا يمثلها! داكشي علاش أي فنان كايطيح فشي ورطة فحال هادي و شي مرات أقل منها كاياخد جميع التدابير اللازمة باش يصلح ما أمكن الصورة ديالو قدام الجمهور ! حيت فهاد الوقت الصورة هي كلشي ! الصوت و التمثيل و الحضور و لا الابداع موجودين و عطاهم الله و ماكايغفروش الاخطاء !
و أول خطوة فطريق اصلاح الصورة هي الاعتذار فاش كادير شي مصيية كحلة و لا كاتكون مشبوه حيت حتى الشبهة ماشي فمصلحة الفنان ، و خصوصا فاش كاتكون متهم فجوج قضايا ديال العنف و الاغتصاب و كايلقاوك مرونها كوكايين و شراب أول خطوة تقدر ديرها باش تصلح صورتك هي تعتاذر بوضوح ! و عظماء الفنانين عبر التاريخ فاش كايقودو السوايع كايعتاذرو بكل وضوح و بكل شفافية و شجاعة و الاعتذار ديالهم كايزيدهم احترام قدام الجمهور و وسائل الاعلام و كايعاونهم يعاودو يبنيو الصورة ديالهم من جديد ! العظيم ميل گيبسون نهار عاير اليهود دار نص اعتذار رسمي واضح و صريح بكل شفافية ” ايه أنا غلطت و سمحو ليا بزاف” !!
نهار هيلاري سوانك مشات لعيد ميلاد ديال رمزان قاديروف رئيس شيشيان و خرجو المنظمات ديال حقوق الانسان كايحتجو عليها حيت الشيشان بلاد كايتخرقو فيها حقوق الانسان، اعتاذرات هيلاري سوانك بكل وضوح و شدات دوك الفلوس لي عطاها رمزان قاديروف كاملين و عطاتهم لجمعية خيرية. العظيمة شارون ستون ف2007نهار سخن عليها فمها و ضحكات على الزلزال لي ضرب الصين و ماتو فيه 76000 شخص! خرجات بالزربة من بعد و اعتاذرات و اعتاذرات معاها شركة “ديور” ! ” اليك بالدوين” عاير بنتو لي عندها طناش عام فالتيليفون و تسربات المكالمة ديالو! ماقالش ليهم شغلي هاداك بنتي هاديك نسبها و نعايرها كيف بغيت، لا خرج و اعتذر لبنتو و لجمهورو حيت عارف راسو شخصية عامة! تايگر وودز البطل ديال الگولف نهار حصل كايخون مرتو و تشوه، خرج ثلاتة ديال الاعتذارات رسمية فوسائل الاعلام! و أسماء أخرى كثيرة ! اعتاذرات على أخطاء يقدرو يبانو للبعض منا بسيطة ! و يقدرو يبانو لينا جزء من الخصوصية ديالهم و لكن واخا هكاك كانو شجعان و خرجوا و اعتاذرو و طلبو السماحة.
هادو الفنانة و المشاهير لي كايعرفو بحق الصورة ديالهم و لي كايخدمو عليها و عارفينها هي راس مالهم الحقيقي! نهار غادي تخسر ماغادي يحاشيها ليهم تاواحد فهووليود ! و حتى الجمهور غادي يقلب عليهم وجهو.
سعد المجرد ديالنا ! خرج أغنية وصلات 3ديال المليون مشاهدة فأقل من 16ساعة ! حاجة عادية حيت كلشي كايتسنى سعد المجرد لي القضية ديال الاغتصاب ديالو دارت ضجة فالمغرب و فالعالم العربي شنو غايخرج كعمل فني مورا ست شهور ديال الحبس.
و داكشي لي كان ! مشيت حتى أنا مني من الناس نشوف هاد العمل الفني و الصراحة أول سؤال طرحتو على راسي وانا كانسمع كلمات الأغنية هوا ” كيسكي نو فا با مع هاد السيد؟” ” آشمن مشكل عندو مع العيالات” و شكون هاد الناس لي ضايرين بيه و كاينصحوه يدير فحال هادشي !؟ ” ! كليب موايان مابيهش! موسيقى مزيانة تصلاح تشد بيها لوطوروت كازا مراكش! و لكن كلمات كارثية الصراحة ! عاوتاني أغنية بكلمات ميزوجينية ” نتي لي غدرتي و نسيتي كلشي ” ” و ماربحتي والو” !
راك كنتي مشدود على الاغتصاب و العنف آ سيمحمد !
راه الشدة ديالك الثانية هادي وااا سيمحمد مورا الشدة ديال ميريكان و بنفس التهمة !
راك دوزتي ست شهور ديال الحبس واخا ضمناتك السفارة و جابو ليك أحسن محامي ففرانسا !؟
شنو معنيتها تخرج دابا بأغنية كاتعاطا فيها مع مرا و كاتعطي العصير ل’شي حد” و كاتشكر صاحب الجلالة ملفوق ؟!
و الطامة الكبرى ! هي ديك ” عطيه العصير” لي فاللخر ديال الأغنية، واحد مازال متهم على ذمة قضية ديال الاغتصاب و العنف و كايقول ” عطيه العصير” ! لمن غانعطيو العصير بالسلامة و العافية آ سي سعد ؟!
نعطيو العصير لورا بريول لي خرجات بحوايجها مقطعين من لوطيل ؟
و لا نعطيو العصير للبوليس الفرنسي لي شدك ؟
و لا نعطيو العصير للمحامي ؟!
شكون معني بهاد عطيه العصير ! ياك درتيها بيديك ! صيدتيها بيديك ! ديتيها لوطيل بيديك ! قصرتي معاها بيديك ؟!
لمن هاد العصير بالضبط ؟!
