كود احمد الطيب /////

الفيديو الفضيحة اللي خرج على ناصر الزفزافي زعيم حراك الريف كلفته الحقوقية كبيرة بزاف. جميع التقارير ديال الجمعيات الحقوقية غير الحكومية وحتى تقارير الدول على الوضعية الحقوقية للمغرب ف2017 غادية تشير ليه. قبل هاد الشي الواحد يدير طلة صغيرة على شكون وشحال من صحف دولية مؤثرة نشراتو.

اللي قلب على تبرئة الزفزافي من التعذيب وسرب الفيديو نسى حاجة مهمة هي صورة لبلاد. نسى باللي الزفزافي مشدود فالحبس وكل مس بادميته المسؤول المباشر عليها هي الدولة. الفيديو زلزل الدولة للي بانت فالحكومة والغضبة اللي عبر عليها الرميد الرجل الثاني في الحكومة بعد رئيسها اللي ما صالح لوالو.

الفيديو ضرب لبلاد وغادي يضربها. ضرب مصداقيتها. ضرب قدرتها على استيعاب احتجاجات الريف. داخليا اعطى نتائج عكسية. تزايد التضامن مع الزفزافي. قلات الثقة فمؤسسات الدولة. تزاد الوعي عند عامة المغاربة بضرورة الدفاع عن حقوقهم. ما بقاو تايقين فحد لا حكومة لا مؤسسات. عندهم غير فمهم ووسائل التواصل الاجتماعي باش يعبرو على هاد الغضب الجماعي من تصرفات كتوقع مرة مرة. بان الوعي الجماعي كضمانة لكل انحراف فالمستقبل.

هاد التسويق ديال المغرب كدولة باغية تمشي فطريق الديموقراطية تخدش بزاف بهاد الفيديو. اليوم كاينة محاكمة اكديم ازيك. فيديو الزفزافي غادي يستغل من دعاة الانفصال فالصحرا باش يطعنو فمؤسسات كالقضاء. خاصة ان هاد المؤسسة تعطلات تعطي النتائج ديال هاد الفيديو. الوقت فهاد الزمان عامل حاسم.

خاص المغرب يكون فوق الجميع ولكن بحال هاد الفيديو كيشقلب المفاهيم والاولويات