كود – آسفي//

عرفات المدينة القديمة ديال آسفي، اليوم الأحد 14 دجنبر 2025 فالعشية، شتا مجهدة، تسببات في غرق بزاف ديال الديور والزناقي، وهاذ الوضع خلا الناس مخلوعين ومكرفسين ومرونين.

حسب المعطيات الأولية، الأمطار القوية تسببات في فيضانات مفاجئة غرقات الزناقي الضيقة والديور لي على سبة، خصوصا فالمناطق الهابطة، وهاد الشي صعّب حركة السير وعرقل تدخلات الإنقاذ فالساعات الأولى. وكاين احتمال تسجيل وفيات أو مفقودين، ولكن هاد الشي باقي ما تأكدش رسمياً من الجهات المختصة.

باش يتصرفو مع الوضع، السلطات المحلية وعناصر الوقاية المدنية مشاو للعين المكان وبدأو عمليات البحث والإنقاذ، وقامو بإجلاء بعض السكان المتضررين، واستعملو آليات باش يشفطو المياه ويفتحو الممرات اللي تدمرت.