كود الرباط//
صمت شركة ريضال حول ما أثير من شبهات تزوير دبلومات من طرف مسؤولين ونقابيين فهاد الشركة باش يترقاو وياخدو مناصب كبيرة، ومنهم اللي عندو مسؤولية سياسية وحزبية وكيسير الشأن العام وعندو تضارب المصالح.
وقبل أشهر فقط، راسلت جمعية الكهرمائيين والريضاليين بالمغرب المدير العام لشركة ريضال بالرباط. من أجل تأكيد أو نفي كل ما أثير حول هذا الموضوع.
وحسب ما تضمنته المراسلة الموجهة إلى المدير العام للشركة المذكورة، والتي يتوفر الموقع على نسخة منها، فإنه استنادا للمادة 27 من دستور المملكة التي تتضمن الحق في المعلومة، من حق جمعية الكهرمائيين والريضاليين بالمغرب وبكل احترام وتقدير مساءلة المسؤول عن الشركة ومطالبته بتقديم المعطيات حول شبهة وجود شواهد مدرسية مزورة لمستخدم أدلى بها من أجل الاستفادة من الترقيات ومناصب المسؤولية.
ريضال فالرباط ديما كتعرف مشاكل والفوضى وشبهات التخلويض، منها قصة نقابي معروف كيتغيب عن العمل، نقابي كانت عندو صفة برلماني حصل كيتغيب وكيستفد من السكن فابور، موظف شبح مستافد على ظهر النقابة ديالو. تفرش بتحقيق داخلي وبمباركة من النقابة ديالو لي طرداتو.
مصدر فريضال قال لـ”كود” بأنه كاين غموض كبير حول شبهات تزوير دبلومات وبلي كاينين جامعات أوروبية غير معروفة يتم اللجوء إليها من أجل الحصول على دبلومات بهدف الترقي فالخدمة.
من بين المسؤولين فريضال لي تراج عليهم هادشي، كمال العمراني نائب عمدة الرباط المسؤول على المجازر، اللي هو عضو فتجمع العاصمة (رغم أن شركة ريضال عندها عقود تدبير المفوض مع الجماعات فالرباط وتمارة وسلا..).
العمراني مدار بيان ومخرجش كينفي، ولا عمدة الرباط فتحات تحقيق حيث همها الوحيد هو تماسك الأغلبية، خصوصا وأنها كتعتمد عليها بزاف فالمهام اللي كينوب عليها.
ماشي غير ريضال لي خالقة مشكل للعمدة، بل كذلك شركة رباط باركينغ لي كان رئيسها السابق هو الزوج ديالها سعد بنبارك، الشركة غارقا إفلاس كيقدر بـ2 مليار.