كود الرباط//

شي محلات فحي أكدال دايرين حالة فكولشي، لا ماكلة نقية ولا احترام السلامة الصحية ولا تسجيل المستخدمين فالضمان الاجتماعي، ومنهم لي كيستغلو الطالبات والمطلقات فالعمل. دبا كيتفضحو.

فحي أكدال، بشارع الأطال، لقات السلطات واحد المحل مشهور، مولاه كيدير فيها واعر وكان سبق ليه احتل الملك العمومي (كود نشرات صور على الفوضى لي دار، واللي أحيانا كيتسبب فمشاكل السير بالطريق)، كيخالف القانون وكيدير دجاج فاسد.

وحسب قرار رسمي رقم 19 بتاريخ 7 مارس الجاري، واللي وقعو نائب العمدة امين صادق، المكلف بالمطاعم والبيران فالرباط داخل المجلس الجماعي، فإن هاد الريسطو “مازن شاف” لا يحترم الشروط الصحية بحيث تم إتلاف 25 كلغرام من الشاورما ديال دجاج.

وكشف القرار كذلك، باللي المحل صغير بزاف والعاملين فيه كثار وهادشي فمطبخ ضيق ومافيهش التهوية. يعني عذاب للمستخدمين.

والقرار كشف كذلك بلي اللباس الخاص بالمستخدمين لا يستجيب للشروط الصحية.

وبناء على عدد من القوانين فإن مجلس جماعة الرباط قرر منع صاحب المطعم من مزاولة نشاطه حين تفادي المخالفات.

هاد المطعم واحد من الأمثلة ديال المخالفات وغياب المراقبة لي خصها تكون بشكل دوري حفاظا على صحة الساكنة.

المطعم كيستقبل بزاف ديال الناس، ودارت ليه المغنية دنيا باطما إشهار فاش جات وكلات عندهم.