كود -dailymail//

تقارير صحفية فضحات كيفاش روسيا كتستغل شباب فقراء من إفريقيا والشرق الأوسط وكتجرّهم للحرب فأوكرانيا بالكذوب، فيديو خرج مؤخراً ورا شاب إفريقي ملصقين فيه لغم وبززو عليه يمشي يفركع راسو فغار أوكراني، مع السبان والعنصرية وتهديد بالسلاح، هاد المشهد صدّم الناس فالعالم كامل.

هاد الشباب كيتشدّو بالسوشيال ميديا، خصوصاً تيليغرام، فين كيتوعّدو بالفلوس والجنسية وخدمة بلا مقاتلة، وحدة روسية كانت أستاذة من قبل ولات سمسارة حرب، كدير فيديوات وكتلبس ماركات سيكسي، وكطمع الشباب: “غير جي هنا كلشي موجود”، ولكن منين كيوصلو لروسيا كيترسلو للحرب بلا تدريب وبلا رحمة.

بزاف من العائلات تقطعات أخبار ولادها مباشرة من بعد ما مشاو، وبعض منهم مات فالحرب، وحدين اخرين ما معروف فين وصلو، اللي حاول يهرب ولا رفض القتال كيتهدد بالقتل ولا بالحبس، وحتى الكونترات ديالهم كتجبد عليهم صحة، يعني إلا دخلتي للحرب ما كاينش لخروج.

هاد القصص كتبيّن باللي المرتزقة الأجانب غير حطب فهاد الحرب، كيتستعملو وكيترمّاو، منظمات حقوقية كتعيّط وتحذّر الشباب ما يتغراوش بالكذوب، حيت الرخا كيخلع.

https://www.dailymail.co.uk/news/article-15485689/Terrified-Francis-strapped-chest-suicide-bomber-reveal-glamorous-Russian-millions-sending-foreigners-deaths-Ukraine-brutal-way-shes-it.html