كود سبور//

شاعلة فماتش المنتخب الوطني المغربي النسوي ومنتخب زامبيا اللي ملعوب اليوم الجمعة، ضمن ذهاب الدور الربع والأخير من اقصائيات أولمبياد باريس 2024.

وسالا الشوط الاول بين المنتخب المغرب للعيالات ومنتخب زامبيا بنتيجة واحد لزيرو لمصلحة اللبؤات، وكان الشوط شاعل حيث الزامبيات حاولو يستغلو حماس الجمهور وضغطو مزيان على لاعبات المغرب، اللي حاولو يسايرو الريتم ويلعبو على ليكونطر أطاكط

وعرفت الدقيقة 34 اعلان حكمت الماتش على بيلانتي خيالي، ولكن الگولة المغربية خديجة الرميشي تصدت لها، أمام صدمة اللاعبة الزامبية اللي ضربت البيلانتي بريسكا جوايا، هي ولاعبات المنتخب الزامبي المصدومات فالوقت اللي عطات الرميشي الثقة لراسها ولصحباتها المغربيات، مع العلم أن ابتسام الجريدي ضعيت هدف حقيقي بعدما انفردت بالگولة الزامبية فالدقيقة 42، ولكن ضربت الكورة بعيد على الشبكة قبل ما تضرب زينب الرضواني هدف واعر بعدما دريبلات المدافعات الزامبيات وصيفطات الكورة نيشان للمرمى فالدقيقة الأخيرة من الشوط الاول.

وغيحاول الناخب الوطني خورخي فيلدا يصحح مع لاعبات المنتخب المغربي الاخطأ اللي طاحو فيها فالشوط الاول، خصوصا فالتحول من الدفاع للهجوم وايضا يعمر وسط التيران باش الزامبيات ما يبقاوش متحكمين فيه ويبعدهم على مرمى خديجة الرميشي، للحفاظ على التقدم واستغلال الخروج ديال الزامبيات للبحث على التعادل وهذا الشي غيخلي مساحات خاص اللبؤات يستغلوها باش يقتلو الماتش على الاقل بهدف ثاني.