كود الرباط//
علمت “گود”، أن الصراع مزال شاعل بين الأعضاء الثلاثة للمجموعة النيابية لنقابة الكنفدرالية الديمقراطية للشغل فالغرفة الثانية: خليهن الكرش، لحسن نازهي وفاطمة زوكاغ.
هاد الصراع لي كان بدا ف أكتوبر الماضي بعد تجديد هياكل الغرفة الثانية ف نصف الولاية التشريعية 2021-2027، التجديد للي مكن لحسن نازهي من إزاحة خليهن الكرش من رئاسة المجموعة. هاد الشي خلا الكرش يتاهم جهات عديدة فمجلس المستشارين باستهدافه شخصيا، على خلفية الصراع للي كان كيجمع بينو وبين رئيس المجلس السابق النعم ميارة، وأيضا بينو وبين أعضاء في المكتب الحالي للمجلس للي كيترأسو محمد ولد الرشيد، نجل حمدي ولد الرشيد، رئيس جماعة العيون.
هاد الصراع تسبب في انشقاق المجموعة إلى نصفين: خليهن الكرش وفاطمة زوكاغ، من جهة، ولحسن نازهي، من جهة اخرى، بوحدو لكن مدعوم من أطراف فمكتب وإدارة المجلس.
الطرفين تقاسمو المكاتب والموظفين الموضوعين رهن إشارة المجموعة، وبداو ف صراع على الحصص والامتيازات المخولة للكنقدرالية الديمقراطية للشغل فالغرفة الثانية.
هاد الشي وصل لمرحلة صعيبة فالصراع مللي قرر الكرش وزوكاغ يزيحو نازهي من رئاسة المجموعة وقرروا يدونو هاد القرار فمحضر كلفوا مفوض قضائي بإنجازه داخل المجلس، الشيء لي اعتابرو لحسن نازهي خرق للقانون من طرف المفوض القضائي للي كيتاهمو بللي دخل لمقر الغرفة الثانية بصفة زائر وليس بصفته الرسمية.
هاد الأمر دفع رئاسة المجلس، حسب معطيات استقتها “كود” من مصادر مختلفة، لرفض تسلم محضر المفوض القضائي، الشي للي زاد أجج الصراع وللي وصل للجلسة العامة للمجلس الأسبوع الماضي مللي فجرات المستشارة زوكاغ هاد المعطيات أثناء المصادقة على مشروع قانون كيهم المفوضين القضائيين.
الصراع بين الطرفين فالكنفدرالية داخل مجلس المستشارين وصل للمكتب الوطني للمركزية النقابية، وما قدرش العلمي الهوير، الكاتب العام بالنيابة للمنظمة، يحسم فيه حيث عبد القادر الزاير، الكاتب العام، ففترة نقاهة بعد إجراء عملية جراحية.
موضوع الصراع داخل مجموعة الكنفدرالية ممكن يعرف تطورات أخرى، خاصة بعد تدخل أطراف من فرق أخرى كتدعم لحسن نازهي ضدا فخليهن الكرش. هاد الأخير، حسب مصادر مقربة، كيستعد يفجر ملفات عندها علاقة بتدبير الشؤون الإدارية والمالية للمجلس فعهد الرئيس السابق النعم ميارة وللي كيتهم فيها مسؤولين فالمكتب ورؤساء فرق بالاستفادة منها بدون موجب حق.
بالمقابل، مصادر أخرى كتقول بللي خليهن الكرش معروف أنه من النقابيين اللي صعيب يتم التحكم فيه، وكيقلب على ضمان منصب قيادي فالكنفدرالية الديمقراطية للشغل عبر صراعاته الخاصة مع أطراف مختلفة وخاصة فمدينة العيون.
