كود – وكالات //

مزالا الدعوة مرونة فالشرق الأوسط مابين إيران وإسرائيل ودول الخليج مورا ما تقنبلات طهران وتقتل المرشد خامنئي الشي لي خلاها تزيد تشعل فالمنطقة.

فوسط هاد الحيحة خدمات الإنقاذ ديال نجمة داود الحمراء فوسط إسرائيل علنات باللي عدد القتلى وصل لـ9 ديال الناس فـمنطقة بيت شمس، وتنقلو 23 واحد مصابين للسبيطارات، 4 منهم حالتهم خطيرة، الهجوم جا فإطار ضربة صاروخية منسوبة لإيران، المجتمع الإسرائيلي تصدم حيث الضربات ولات مباشرة وكتخلي قتلى مدنيين.

ميريكان حتى هي ماتو ليها عساكرية. القيادة العسكرية الأمريكية للشرق الأوسط “سنتكوم” قالت باللي تقتل 3 عساكرية ميريكان وتصاب 5 خراين من بداية الهجوم الاسرائيلي الامريكي

https://x.com/i/status/2028124761268563970

من جهة أخرى، وزارة الدفاع فالإمارات خرجات أرقام مفصلة على الهجوم اللي بدا نهار 28 فبراير 2026، حسب المعطيات الرسمية، تطلق 165 صاروخ باليستي من إيران، وتحبس 152 واحد منهم 13 منهم طاحو فالبحر، أما الدرونات توقفو 541 طيارة، هاد الهجمات خلات 3 قتلى من جنسيات باكستانية، نيبالية وبنغلادشية، و58 إصابة خفيفة من جنسيات اخرى.

فالكويت، وزارة الصحة علنات على موت ديال شي واحد براني والعشىرات تقاسو، أما فمضيق هرمز، التلفزيون الرسمي الإيراني قال بلي ناقلة نفط “غرفات” بعدما دازت من المضيق بطريقة ماشي قانونية حسب الرواية الإيرانية، هاد التطور كيهدد الملاحة الدولية وأسواق الطاقة.

https://www.facebook.com/share/r/1EX33Z9Bqx/

سياسياً دول الخليج غادي دير مؤتمر فيديو باش تناقش تطورات الوضع، أما وزير الخارجية السعودي عيط على السفير الإيراني فخطوة دبلوماسية كتوضح شحالل صداع واقع.