كود سبور//

كايبان أن اختيار الفائز بالكرة الذهبية لعام 2024، غايخلق جدل كبير، وهذا الشي حسب ما كشفت عليه وسائل إعلام إسبانية.

وقالت جريدة “ماركا” الإسبانية، اليوم الاثنين، إن معلومات وصلت إلى ريال مدريد، بأن النجم ديالو البرازيلي ما غايربحش جائزة “الكرة الذهبية” 2024، واخا ربح دوري أبطال أوروبا وبطولة الصبليون.

أما راديو “مونت كارلو” الفرنسي فكشف أن الإسباني رودري لاعب مانشستر سيتي النگليزي هو اللي غايربح الكرة الذهبية، فالحفل اللي غايكون اليوم الاثنين بالليل فباريس، حيث ربح بطولة النگليز وكأس أوروبا.

الإعلامي الإيطالي فابريسيو رومانو، كشف أن فينيسيوس ما بقاش مشى لباريس باش يحضر حفل الكرة الذهبية ملي عرف أنه ما غايربحهاش ونفس الشي بالنسبة لريال مدريد.

للإشارة فالكرة الذهبية كاتعطيها مجلة “فرونس فوتبول” الشهيرة، حسب عدد من المعايير، وهي النيفو الفردي ديال اللاعب والدور ديالو وسط الفريق والإنجازات اللي حقق واللعب النظيف.