كود سبور//

نايضة على المركز الثاني والثالث فالبطولة الاحترافية، المؤهلين إلى دوري أبطال أفريقيا وكأس الكونفدرالية، وهذا الشي بعدما حسم نهضة بركان المركز الاول واللقب معهم البطاقة الاولى المؤهلة للشومبيونزليگ.

الصراع على المركز الثاني المؤهل للمشاركة فدوري ابطال افريقيا، شاعل بين الجيش الملكي اللي هو الثاني دابا فالبطولة برصيد 54 نقطة، والوداد الرياضي المحتل للمركز الثالث برصيد 51 نقطة، وهذا الشي قبل دورة واحدة من نهاية الشومبيونا.

ومحتاجين الجيش الملكي للرباح اول التعادل فالماتش ديالهم الجاي ضد حسنية أكادير فتيران برشيد غدا الاحد برسم الدورة 30، او يخسرو الوداد الرياضي مع نهضة الزمامرة.

وبالمقابل فالوداد الرياضي خاصهم يربحو نهضة الزمامرة فنفس الدورة ونفس التوقيت فستاد دونور، ويتسناو الجيش الملكي يخسرو مع حسنية أكادير مع العلم ان الفريق السوسي ضمن يلعب الباراج، وهادي هي الحالة الوحيد اللي يقدرو فيها الوداد ياخدو المركز الثاني، حيث النسبة الخاصة كاتعطيهم الامتياز على حساب ليفار فحالة تعادل الفريقين فالنقاط، على اعتبار ان الوداد تعادلو ذهاب مع الفريق العسكري فالقنيطرة وربحوه فالروتور بجوج لواحد فكازا.

أما بالنسبة للمركز الثالث، فالصراع عليه مازال شاعل بين الوداد الرياضي اللي باغي يحافظ عليه باش على الاقل يرجع يلعب فكاس الكونفدرالية، إلى ما قدرش يحقق المركز الثاني المؤهل للمشاركة فالشومبيونزليگ، والفتح اللي محتلين دابا المركز الرابع برصيد 50 نقطة، والفريقين بيناتهم نقطة واحدة، مع العلم ان الفتح لاعبين ضد النادي المكناسي اللي ضمنو البقاء، والرباطيين وخاصهم يربحو ويتسناو الوداد تخسر او تتعادل باش ياخدو الثالثة المؤهلة لكاس الكونفدرالية.