كود الرباط//
نهار الخميس المقبل فالرباط، غا تشعل بين، من جهة، عزيز هناوي، القيادي فحزب العدالة والتنمية المتزعم للتيار المناهض للتطبيع؛ ومن جهة أخرى، محمد أوزين، الأمين العام لحزب الحركة الشعبية، للي كيوجد من دابا للانتخابات. أوزين قرر ينظم ندوة بالرباط من خلال مؤسسة لحسن اليوسي التابعة لحزب الحركة الشعبية حول موضوع “خصائص الهوية المغربية بين التأصيل والتحديث” وعرض على مجموعة من المتدخلين للندوة منهم خاصة اليهودي جاكي كادوش، والسلفي محمد الفيزازي، والموري عبد الخالق كلاب.
محمد والزين (أوزين) كان وجه رسالة لعزيز هناوي حول موضوع التطبيع مع إسرائيل نشراتها مواقع عديدة وخلقات جدل كبير.
مصادر قالت بللي هناك اتصالات من قبل إخوان عزيز هناوي وأحمد ويحمان باش يردوا على والزين وينظموا وقفة احتجاجية على مشاركة جاكي كادوش فهاد الندوة.
للتذكير، الحركة الشعبية والعدالة والتنمية فعهد المؤسسين لمحجوبي أحرضان والدكتور عبد الكريم الخطيب كانت علاقتهم جيدة وفمرحلة معينة ف 2003 دارو تحالف ضد مدونة الأسرة. اليوم، فعهد محمد والزين وعبد الإله بنكيران، توترات العلاقات بسبب حسابات داخل المعارضة وقرب الانتخابات التشريعية ف 2026 وبحث كل واحد من الحزبين على شي قضية للركوب عليها: الأمازيغية بالنسبة للحركة، واخا الحركة مخدماتش مزيان فهاد القضية (بالمقارنة مع تحركات الأحرار والبام فهاد القضية)، والتطبيع بالنسبة للبيجدي رغم أن هاد الحزب هو للي وقع على التطبيع.
واش غادي تستمر المواجهة ولا غادي يتدخلو الحكماء بين الحزبين ويصفيو الخواطر، لأن التاريخ المشترك أكبر من عنتريات هناوي وصاحبو ويحمان، يقول مصدر حركي.
