كود – وكالات//

شركة BYD الصينية بدات كتجرب باتري من الجيل الجديد وسط طوموبيل BYD Seal، وهاد تيست كيدوز فطرق حقيقية فالصين، ماشي غير فالمختبرات، الباتري الجديد كيخلي الطوموبيل ضرب حتى لـ1500 كيلومتر بشارج واحد يعني تقريبا من طنجة تال ݣلميم فالصحرا .

وماشي غير الطريق لي كضرب مجبدة، حتى الشارج ولى سريع بزاف، غير بـ12 دقيقة تقدر تعمّر حتى لـ80% من الباتري، وترجع تكمل تاني من ݣلميم حتى لنواكشط، هاد السرعة كتقرب الطوموبيلات ديال ضو من تجربة الطوموبيلات العادية من حيث الراحة، الباتري الجديد لي كتجربها BYD  ماشي بحال الباتري التقليدي، حيث كتستعمل تكنولوجيا “الباتري البلاندي”، لي كيكون أكثر أمان، وكيعيش مدة طويلة، وكيخزن طاقة أكثر فطاي صغيرة.

ومن ناحية الأرقام، هاد الباتري يقدر يوصل لكثافة طاقة ديال 400 واط/ساعة لكل كيلوغرام، وهو رقم كيفوت تقريباً بالضوبل الباتريات ديال اليوم اللي كتوصل بين 150 و250Wh/kg .