كود سبور//

توعت تاني الدولي المغربي شادي رياض لاعب كريستال بالاس النگليزي، وهذا الشي بعدما برا مؤخرا من الاصابة اللي كانت جاتو مع بداية الموسم، وخلاتو يغيب لأشهر على التيرانات.

وكشف أوليفير گلاسنر مدرب كريستال بالاس، في تصريح له قبل ماتش الفريق ضد برينتفورد، هذا الويكاند برسم منافسات بطولة النگليز، أن شادي رياض توعت فالركبة ديالو، وما غايكونش فالماتش.

وقال مدرب شادي رياض، ان الأطباء غايديرو فحوصات للاعب المغربي وغايشوفو كيفاش غاتمشي الامور، وحتى لدابا ما عارفينش شحال هي مدة الغياب ديالو.

وكان المدافع المغربي شادي رياض اللي كايلعب اول موسم له فالنگليز جاي من ريال بيتيس الإسباني، (كان) رجع يلعب قبل ايام، وكان حاضر مع كريستال بالاس ضد ستوكبورت ضمن الدور الثالث من كأس اتحاد النگليز ولعب رسمي بعدما غاب من نهاية غشت 2025، بسبب الاصابة اللي جاتو.