وكالات //

خرجات آن هيدالغو، العمدة ديال العاصمة الفرنسية باريس كتزاوك السكان ديال العاصمة أنهم مايخويوش المدينة ديالهم فالألعاب الأولمبية لي غادي تكون الصيف الجاي فالمدينة.

هيدالغو، وخلال الزيارة ديالها لواحد التيران جديد تبنى في العاصمة وغادي يحتاضن المنافسات، قالت أن الريسطورات غادي يعيشو أزمة خايبة ايلا مشاو.

العمدة ديال باريس خافت لتعيش المدينة نفس الأزمة لي عاشتها لندن فالأولمبياد ديال 2012، فين خرجو النكالزة من مدينتهم باش يخليوها للزوار وعاشو الريسطوات أزمة حقيقية، حينت أغلب الزوار كيمشيو ياكلو غير فالسناكات ديال الفاست فود.

وعلى حساب ماقالت الصحافة ديال فرنسا، فراه بداو بزاف ديال الفرانساويين من دابا كيحطو الديور ديالهم للكرا فالصيف للناس لي غادي تجي لباريس باش تتفرج فالألعاب الأولمبية.