وكالات//

قدمات السلطات التركية واحد الشاب للمحاكمة بعدما دخل للكوميسارية ديال البوليس وهو هاز معاه الجثة ديال واحد السيدة بين يديه، وقاليهم إنها ماتت بسبب طلقة طائشة بعدما دابزو داخل الطوموبيل.

وكشفات التحقيقات تفاصيل صادمة على هاد الحادثة لي وقعات ف 7 من هاد الشهر بمنطقة كوناك في مدينة إزمير.

وعلى حساب ما جا في نتائج لونكيط فالمتهم لي سميتو إردنتش باليكايا (34 عاماً)، قال إن الضحية، إيدا كوش (29 عاماً)، هي لي ضربات راسها بالفردي لي خرجاتو من الساك ديالها.

ولكن التحقيقات ثبتات أن الفردي ديال السيد لي كان معاها ومكانش ديالها وهو لي ضربها بالقرطاس بعدما دابزو.

وكشفات التحقيقات كذلك أنه بين الضحية والجاني كانت علاقة حب واخا كانو مزوجين بجوج بيهم، وسبق ليه تعدا عليها في اكثر من مرة.