الرئيسية > آراء > سي دوماج ! دوماج انه الزلط و عدم وضوح الرؤية و المجهول كايخلي اجيال ديال عباد الله تمارس مهن ماحاملاهاش ! بعرور كايفيق شي نهار كايلقا راسو طبيب حيت باه بغاه يكون طبيب ! و لا كايفيق كايلقا راسو جادارمي حيت هوا الكونكور الوحيد لي نجح فيه
15/06/2019 14:00 آراء

سي دوماج ! دوماج انه الزلط و عدم وضوح الرؤية و المجهول كايخلي اجيال ديال عباد الله تمارس مهن ماحاملاهاش ! بعرور كايفيق شي نهار كايلقا راسو طبيب حيت باه بغاه يكون طبيب ! و لا كايفيق كايلقا راسو جادارمي حيت هوا الكونكور الوحيد لي نجح فيه

سي دوماج ! دوماج انه الزلط و عدم وضوح الرؤية و المجهول كايخلي اجيال ديال عباد الله تمارس مهن ماحاملاهاش ! بعرور كايفيق شي نهار كايلقا راسو طبيب حيت باه بغاه يكون طبيب ! و لا كايفيق كايلقا راسو جادارمي حيت هوا الكونكور الوحيد لي نجح فيه

سهام البارودي – كود//

وانا كانهضر مع واحد الصديقة ديالي على ولدها لي غايدوز الباك ! جبدات واحد الموضوع مهم ! قالت ليا تخايلي دابا الدراري لي كايقراو مزيان كاتلقايهم مقاتلين باش يجيبو المونسيو و نقطة مزيانة فالباك باش يدوزو گاع لي كونكور و الحاجة لي نجحو فيها يمشيو ليها ! المهم يجيبو النقطة لي تضمن ليهم يدوزو گاع لي كونكور ديال المدارس الكبيرة و كليات الطب و الصيدلة و ماكايقلبوش على شي مدرسة لي كاتناسب ميولاتهم ! ماكايفركوش گاع فمسألة الميولات!

النقطة لي هضرات عليها الصديقة ديالي مهمة و رجعاتني ليامات الباك ديالي ! فاش حتى انا كنت كانتقاتل باش نجيب المونسيو و نقطة مزيانة تأهلني ندوز الكونكورات ديال مدارس كبيرة و ندخل نقرا شي حاجة مزيانة لي نقدر نخدم بيها من بعد ! و فحال گاع الطلبة لي كانو فحالي من اسر متوسطة و مقودة عليها ماكايكونش عندك داك الاختيار ديال دير لي بغيتي ! لا خاصك تقرا شي حاجة لي غاتخدمك و غاتخدمك مزيان و تضمن ليك صالير مزيان ! مهندسة ! طبيبة ! اطار كبير فشي شركة ! هادشي لي كايشوفوه التلاميذ ديال الباكالوريا ! او اغلبهم ! ماكايشوفوش شنو هوما كايبغيو ! شنو يبغيو يخدمو ! شنو يحبو يديرو فالمستقبل ! و اصلا فاش كاتكون جاي من اسرة مقودة عليها راه اغلب الخدامي الزوينين كاتكون غا سامع عليهم هادشي زيد عليه انه ماكايكونش عندك لي يوجهك !

تخايل تكون باغي دير السينيما و لا المسرح و لا كتابة السيناريو و لا شي مهنة من المهن الثقافية ؟ طبعا هادشي كايبان ضياع بالنسبة للوالدين ! و لا تقول ليهم بغيت نولي كاتب ! بغيت نولي كاتب كبير و نكتب الروايات فحال جي كي رولينغ لي كتبات هاري بوتر ! و الله تاتشير عليك مك بأحسن صندالة ! حيت النجاح فالاسر المغربية هوا تكون طبيب و لا مهندس و تشري الدار و دير طوموبيل ! مول واحد لي كاين ديال النجاج فحال المول ديال كيكة خاصك تخشا فيه و تنجح و تبقى فيه ماتخرجش منو و لا خرجتي منو يا ويلك !

هادشي علاش كانشوف انه اغلب التلاميذ اليوم فحال التلاميذ ديال البارح ماتبدلوش بزاف ، حتى هوما قليل فيهم لي تاحت ليهم فرصة التفكير فشنو باغين يديرو فالمستقبل و شنو هي الخدمة لي كاتواتيهم و كاتواتي ميولاتهم و شخصياتهم ، قليل فيهم لي ماغاتلقاش عندو داك العبء ديال انه خاصو يخدم باش يصوفي راسو ، يخدم و صافي و ماشي مهم كيفاش و علاش؟! القراية كلهم باغين يوليو أطباء و مهندسين و يديرو ليسكاو و لا شي مدرسة عسكرية ديال الضباط ! و المضغضعين اغلبهم باغين غي ينجحو و يتخشاو فلافاك و لا الصونطر و يخرجو معلمين و اساتذة و يدفعو لكونكورات متصرفي الوزارات و الجماعات المحلية ! الدراري كايفكرو غي فالخدمة و الصالير و جمافو على الميولات حيت فاش كاتكون حازق ماعندكش الحق فالميولات ! نتا اصلا مايل و طاسيلتك مايلة فين باغي تزيد تميل مازال ؟!

سي دوماج ! دوماج انه الزلط و عدم وضوح الرؤية و المجهول كايخلي اجيال ديال عباد الله تمارس مهن ماحاملاهاش ! بعرور كايفيق شي نهار كايلقا راسو طبيب حيت باه بغاه يكون طبيب ! و بعرورة كاتفيق كاتلقا راسها شي نهار مهندسة حيت مها قالت ليها بلي لاخدمات مهندسة راه غادير الفلوس و الدار و الطونوبيل ! ماكاينش حب المهنة !فحال شي جواج تقليدي غير هنا عوض مايجيبو ليك الراجل و لا المرا كايجيبو ليك خدمة !   و هادشي لي كايخلق طبيب گزار ! و استاذ غشاش ! و محامي شلاهبي ! و اطار بنكي شفار ! و فرملية رشايوية ! حيت بنادم كايشوف فديك لخدمة غي مصدر عيش و صافي ماشي وسيلة لتحقيق الذات كايمشي ليها و هوا فرحان !

شوفو عباد الله فكازا فاش كايكونو غادين لخداميهم مع الثمنية د الصباح فشي فوروج ! غايبان ليك كلشي مخنزر و منفوووخ فحالا معشين بالفاخر !

 

موضوعات أخرى