خالد تيجر- گود سبور- وجدة//

عبر البلجيكي توم سينتفيت مدرب منتخب مالي على الفرحة ديالو، حيث كاين فالمغرب باش يلعب مع الماليين الجوج ماتشات ديالهم ضد كل من جزر القمر فبركان وضد إفريقيا الوسطى فالعربي الزوالي بالدار البيضاء، واشاد بالبينة التحتية ديال المملكة المغربية من ملاعب ولوطيلات وغيرها واكد ان ماشي اي بلد متوفرة فيه امكانيات بهذا المستوى وان بلجيكا بلادو وما فيهاش ملاعب بمستوى الملاعب المغربية، وتأسف حيث المغرب غاينظم كاس العالم مع 2 بلدان اخرين وقال انه بالنسبة له المملكة المغربية بالامكانيات اللي عندها قادرة على تنظيم المونديال بوحدها.

وخلال حوار له مع جورنال “گود” بمقر الإقامة ديال منتخب مالي فمدينة السعيدية، هضر توم سينتفيت مدرب الماليين، على البنية التحتية المغربية، وقال: “كان عندي امتياز أنني لعبت بزاف ديال الماتشات هنا فالمغرب، حيث فالثلاث سنوات الأخيرة ما كنتش نقدر نلعب داخل الميدان، وتقريبا كنت كانلعب كل ماتش فالمدن المغربية، ولعبت فمراكش، وكازا، والجديدة، وأكادير، ومن قبل زرت الرباط، وطنجة، ودابا هنا فالسعيدية حدا بركان، وماشي گاع الدول عندها بنية تحتية بحال المغرب، وحنا فبلجيكا وما عندناش تيرانات بالمستوى بحال ديال المغرب، وماشي غير الملاعب اللي عندو راه كاينين حتى جودة العشب وملاعب التداريب”.

وكمل سينتفيت، اللي فرحان برباح البارح الخميس مع مالي على جزر القمر بثلاثية لزيرو، قبل ما يمشيو لكازا باش يلعبو ضد افريقيا الوسطى، وقال: “المغرب بلاد ديال الكورة كايعارفو ادارة ما يتعلق بالملاعب والمباريات وتنظيماتها مزيان، وبلاد كبير فالكورة، وراني فرحان حيث كاس العالم غايتلعب هنا بالمملكة المغربية، وللاسف وغاتنظمو مع 2 بلدان اخرين، حيث بالنسبة ليا أنا المغرب قادر بوحدو ينظم المونديال، راه بلاد ديال الكورة وعندو موقع استراتيجي وسط العالم”.

وأكد البلجيكي توم سينتفيت، وقال: “راه المغرب عندو ومتوفرة فيه گاع البنية التحتية وماشي غير التيرانات، وعندو لوطيلات والمطارات وغيرها، والمغرب راه بلد فانطستيك ورائع وكلشي فيه منظم مزيان، والمرافق ديالو واجدة لتنظيم البطولات العالمية الكبيرة”.