خالد تيجر- گود سبور//

اعتبر توم سينتفيت مدرب مالي خصم المنتخب الوطني المغربي فالمجموعة الاولى من كاس افريقيا “المغرب2025″، ان المغرب هو المرشح الاول والاقوى للتتويج باللقب القاري، وانه حاليا اقوى منتخب افريقي، ومن بين اقوى المنتخبات عالميا، ومرشح للتتويج بكوب ديموند ماشي غير بكوب دافريك.

وخلال حوار له مع جورنال “گود”، عطى توم سينتفيت مدرب مالي الرأي ديالو فالمنتخب الوطني المغربي اللي غايلعبو ضدو فالماتش الثاني من دور المجموعات د كوب دافريك، وقال: “شفنا فكاس العالم فقطر، وكيفاش المنتخب المغربي تطور، وولى دابا احسن منتخب افريقي ومن أحسن المنتخبات فالعالم، والمغاربة قدرو يستفادوا من احسن المواهب اللي فأكاديميات المغرب (أكاديمية محمد السادس لكرة القدم) والبنيات التحتية المسخرة من طرف الجامعة الملكية المغربية لكرة القدم، واللي احسن من امكانيا اندية أوروبية، ودابا كانشوفو النتيجة ديال هذه الخدمة، بالإضافة إلى المواهب المغربية اللي قدرت تطور وتفرض راسها فأوروبا، واللي ولاو متحمسين باش يلعبو ويمثلو المنتخب المغربي ويكتبو التاريخ معه، وهذا راه مشروع بداه المغرب من وقت طويل”.

وبخصوص الحظوظ ديال المنتخب الوطني المغربي فكاس افريقيا 2025، وضح المدرب البلجيكي توم سينتفيت، اللي عندو خبرة كبيرة على مستوى الكورة الافريقية، من بعد التجارب والمنتخبات الافريقية اللي دربها، ووضح: “المنتخب المغربي هو منتخب محترم، ويقدر يربح كل نسخة من كاس افريقيا، وخصوصا النسخة الجايا من كوب دافريك اللي كاينة فالمغرب، وبالنسبة ليا هما المرشحين الاقوى للتتويج باللقب مع منتخب نيجيريا، وراه المغرب يقدر يمش للمونديال كواحد من المرشحين للتتويج بكاس العالم، وكانشوفو اللاعبين اللي عندهم دابا وحتى اللاعبين الاحتياطين، والامكانيات اللي مرصودة من طرف الجامعة الملكية المغربية لكرة القدم، والاحترافية ديالها فالتنظيم والعمل، وهذا الشي راه مخلي المغرب بلاد كبير فالكورة على المستوى العالمي”.

وبالنسبة للاعبين المنتخب المغربي والإمكانيات الفردية اللي عندهم، اللي ممكن تدير الفرق فكاس افريقيا ضد اي منتخب غايواجهو المغرب، وضح توم سينتفيت مدرب مالي، وقال: “بالنسبة ليا قوة المنتخب المغربي ماشي غير فالفرديات، ولكن فالفريق كامل، شحال هادي المغرب كانو عندو نجوم عندهم تقنيات فردية كبيرة، ولكن دابا مع وليد الركراكي وقبل منو مع هيرفي رونار ووحيد حاليلوزيتش قدرو يؤسسوا گروب من اللاعبين اللي ممكن يديرو شي حاجة، وبإمكانهم يربحو شي لقب ويمشيو حتى لفينال كاس العالم، راه المغرب فيه أسماء كبيرة ها اشرف حكيمي وها حكيم زياش ولاعبين اخرين كبار، وشفنا الأشهر الأخيرة شمس الدين طالبي اللي تألق فبطولة بلجيكا وماركا بزاف ديال الاهداف، وبالنسبة ليا المغرب منتخب اللي قوتهم فالگروب وفأنهم يخدمو كمجموعة، وراه وراه واخا تكون عندك أسماء كبيرة تقدر ما تربحش لقب، ولكن ممكن تربح لقب بمجموعة قوية وفريق كبير، وهنا فين كاينة قوة المنتخب المغربي”.