كود – كازا ///
قالت تقارير إعلامية، أن 17 شاب مغربي حاولو، البارح الأحد، يدخلو الطاليان بطريقة غير شرعية بعد ما وقفات الطيارة اللي كانت فرحلة جوية بين طنجة واسطنبول بصفة اضطرارية فمطار روما بسباب أزمة قلبية تصابت بيها امرأة، وباقي ما معرفش واش القضية مخطط ليها..
وأضافت التقارير ذاتها، أن الراكبة بانت عليها أعراض نوبة قلبية، على حد قولها، وطلبات المساعدة الطبية العاجلة من الطاقم اللي طلب الهبوط بشكل عاجل ف المطار المذكور لتقديم الإسعافات الأولية اللازمة للمرأة المعنية.
وبعد توقف الطيارة ف المطار الإيطالي، حاول 17 شاب مغربي الهروب عبر الباب الخلفي ديال الطيارة، لكن عناصر الأمن الإيطالي تمكنو من إحباط محاولتهم. وطرا نفس البلان ف مطار مايوركا ف نونبر 2021، بعد استغلال 22 مغربي لطوارئ طبية وهمية وسط طيارة توقفات اضطراريا فاسبانيا وهربو جماعيا من الطيارة.