سهام البارودي – كود//

سيمانة كحلة دازت على اللحايا فالمغرب، عياو مايغوتو و يبكيو و يلعبو على العاطفة باش الناس تقاطع موازين و فالمقابل موازين عاود ارجع و اكثر قوة من شحال هادي، السهرة ديال الداودية سجلات آلاف الحضور الطايح اكثر من النايض و النايض مالقا فين يطيح، صحاب لا ترقصوا على جثث اخوانكم غايطرطق فيهم شي عرق، المغاربة ماشي غا رقصوا، رقصوا و دردكو و تحيرو و جبذو، الشعورات غا ملاوحة فمنصة موازين، بلا مانهضرو على السهرة ديال حميد القصري لي النص فالجمهور شدوه المسلمين و السهرة ديال الديڤا هيفاء وهبي لي جاو يتفرجو فيها المغاربة من كل فج عميق.

و بلاتي ماشي غير المقاطعة لي فشلات، حسن الكتاني لي كان تشد مورا احداث سطاش ماي الارهابية حتى هوا عيطو ليه البوليس “بحيتة”، يصحابو دوك الجلالب و التارازات و الآوت فيت ديال سندباد البحري لي كايضرب عاطينو الحصانة باش ينشر الافكار الظلامية ديالو فالفايسبوك و يطعن فالشرف ديال عباد الله، ايوا هاهوا مشا بحيتة.

و بلاتي مازال، داك باقلال و لا بوقلال لي كان دار الخطبة العصماء فشي جامع فآيت ملول و يصحابو راسو كايخطب فقندهار، داكشي مصور بالدرون و جالس علينا شرذمة مات شرذمة ! تاهوا جاتو العيطة، قالو ليه دوز تجلس اشمن خطبة واشمن ملاوي؟
المهرجانات في المغرب و الناس ناشطة و اللحايا كايعيط ليهم المخزن واحد مورا واحد، و الله الى من احسن الاسابيع لي دازو فالمغرب.

What a wonderful time to be in Morocco !