كود الرباط ////

البارح فاليوم الوطني لفرانسا 14 يوليوز حضر ابن عرفة البي جي دي للاحتفال. حضرو مسؤولين حكوميين حاليين وسابقين ومسؤولين امنيين بحال حسني بنسليمان وشخصيات كثيرة فميادين مختلفة من الاعلام الى الاقتصاد والمال والاعمال والمقاولات….

كان داك الشي زوين ولكن باش بان بنعرفة بان اللي غادي تشوه بها. طبعا كان وفي لعادتو. تصورو معانا سفير فرنسا بالمغرب لغتو الام والاخت والاب والبنت والجدة وللي بغيتو هي الفرنسية٬ وجد كلمة مكتوبة وقراها. ما خرجش علي النص بلغة ابن عرفة. صاحبنا حلف حتى يحشم بينا. اولا قال باللي ما موجدش الكلمة ثانيا قال غادي يتكلم من القلب. هنا تكلم من شي بلاصة اخرى ماشي القلب. لا مضمون. لا افكار. لا رؤية. كينيك فالكلام وزايدها بالاخطاء، المؤنت يذكرو والمذكر يؤنتو ويجمع اللي ما يتجمع من الصفات.

واش انت عندك مؤسسة جاي لعيد وطني دولة بحال فرانسا اما تكلم بالعربية او الدارجة ويترجمو داك الشي او وجد هادوك اللي معاك فرئاسة الحكومة اش كيديرو. شوهتينا. لمغاربة اللي حضرو تماك من غير ديولك حشمو. ماشي على تكلم ولا اللا بالفرنسية مزيان =واخا انت قريتي بالفرنسية عا كول لينا كيفاش قريتي فيها= ولكن حقاش بيني راسك هاوي بزاف. مسيتي راسك ومسيتي مؤسستك وبينتي ان اللبسة كبيرة عليك بزاف بزاف. الله ياخد الحق فاللي جابك ووصلك لمنصب ما انت اهل له