كود علي الصافي العيون////

قرار مجلس الامن الليلة 31 اكتوبر 2025 تاريخي، إذ صادق على قراره رقم 2797 المخصص لنزاع للصحراء والداعم لمبادرة الحكم كأساس لحل نزاع الصحراء.

وحظي قرار مجلس الأمن بموافقة 11 عضوا من أصل 15 دولة عضوا بالمجلس.

سيدنا بعدها بربع ساعة تقريبا دار خطاب موجه للشعب المغربي قال فيه باللي المغرب دوز 50 سنة من التضحيات واليوم بدأ فتح جدي فمسار ترسيخ مغربية الصحراء، والطريق النهائي لهذا النزاع المفتعل في إطار حل توافقي على أساس مبادرة الحكم الذاتي.

يوم تاريخي اعتبرو سيدنا. هاد اليوم بان فكل نقطة بالمغرب. كلشي دار الخطاب وكلشي فرح وردد “عاش الملك”. هاد الشي عاشتو “كود” فريسطو بيضاوي. عرس كبير. يوم تاريخي بطلو سيدنا.

شوارع المغرب من كازا للرباط للعيون للداخلة لسطات لتطوان لطنجة…. تأكيد لهاد الأمر.

سيدنا ف26 سنة قدر بدهاؤو وخدمتو وذكاؤو… على ماشي غير الانتصار فالقضية الاولى سياسيا بل وقع تغيير جذري فالمناطق الجنوبية من لعيون حتى الحدود المغربية الموريتانية. استثمارات ضخمة. مدن حديثة. موانئ كبيرة. مطارات بمواصفات واعرة. طرق مجهدة. مشاريع فتحلية مياه البحر. فالفلاحة. فالصيد البحري فالسياحة.

كلشي اللي وقع ما وراه لا دبلوماسية بوريطة ولا غيرو. وراه عمل ذكي فعال وديبلوماسية فيها ابداع من سيدنا من الحكم الذاتي ف2007 فالمشروع التنموي للأقاليم الجنوبية وبعدها بعد سنوات من العمل جا الاعتراف بمغربية الصحرا من امريكا وتبعاتها اسبانيا وألمانيا وفرنسا وبريطانيا والتحول فالموقف الروسي. كلشي وراه ملك محبوب. كلشي وراه سيدنا