كود كازا ///

البارح الاثنين سلم وزير الخارجية والتعاون ناصر بوريطة رسالة بعثها الملك محمد السادس الى الملك سلمان بن عبد العزيز ال سعود. الرسالة عطاها بوريطة لوزير الخارجية السعودي فيصل بن فرحان

البيان اللي دار ما فيهش معطيات. قال ليك اللقاء داخل فسباق “التواصل المستمر بين قيادتي البلدين وفي إطار العلاقات المتميزة التي تجمع المملكتين المغربية والسعودية، والعلاقة الأخوية القوية التي تربط بين جلالة الملك وخادم الحرمين الشريفين”

وباللي هاد اللقاء “مناسبة لاستعراض علاقات التعاون الوطيدة بين المملكتين على جميع الأصعدة وسبل الارتقاء بها، انسجاما مع تطلعات القيادة الحكيمة في البلدين وبما يخدم مصالح الشعبين الشقيقين”

يعني الانشاء وصافي. الهدرة اللي ديما كتعاون. لكن اش دا يقدر يكون فهاد الرسالة؟ واش ممكن تكون على طلب دعم مغربي من السواعدة فهاد الوضعية الصعيبة اللي عارفة ارتفاع كبير للبترول؟ هاد الشي مستبعد. ممكن يكون ولكن كاينة طرق اخرى وقنوات اخرى.

اللي مرجح هو القمة العربية اللي غادية تكون نهار 1 و2 نونبر اللي داخل بالجزائر. لحد الان الملك محمد السادس مشارك فهاد القمة. هاد الشي كان دوزاتو مصادر مغربية ف”جون افريك” و”الشرق الاوسط”. حسب ما علمته “كود” فمشاركة سيدنا فالقمة مازالت قائمة.

حتى وسائل الاعلام الرسمية المغربية كتوجد باش تمشي. مهيأة راسها وما قال ليها حتى شي واحد دابا راه هاد الشي تأجل.

ولكن هاد المشاركة مرتباطة بميزاج حكام الجزائر. ايلى دارو شي تصرف قبل هاد القمة فيه تصرف عدائي ضدنا كلشي غادي يتقلب وممكن المغرب يقاطع هاد الشي كولو.