أنس العمري-كود///

سيدنا غادر كازا. الملك محمد السادس أنهى، مساء أمس الثلاثاء، زيارته إلى العلصمة الاقتصادية الدار البيضاء، واللي دوز فيها الجزء الأكبر من أيام رمضان.
وزيارة سيدنا للمدينة هاد الأيام خلاها مضبوطة كيف الساعة، ما أتاح لسكانها يدوزو رمضان فأجواء هادئة وزوينة.
انتشار كبير لرجال الأمن في نقاط مهمة ومحددة، وكذا وعبر دوريات بالسيارات والدراجات، وهادشي خلا منسوب الإحساس بالأمان يطلع بزاف عند سكان وزوار المدينة. والأكثر من ذلك أن هاد الحضور المكثف كان ليه أثر إيجابي على حركة السير اللي اتسمت بالانسيابية، في الوقت اللي معروف أن شهر الصيام كتغرق فيه شوارع كازا فازدحام رهيب، خصوصا قبل موعد الإفطار.
وهذا، دون نسيان الدور لي لعباتو الحملة الكبيرة لي دارت على المواطر في تخليص الطرقات من كابوس الصوكان الاستعراضي، لي كيشكل تهديد على حياة مستعملي الطريق.
ماشي غير هادشي، النظافة هاد الأيام في المدينة كانو فأعلى مستوى. تدخلات مكثفة عمليات كنس وجمع للأزبال كانت كدار بشكل دوري، الشي اللي خلا الدار البيضاء بهية وفأجمل حلة.
ومع مغادرة سيدنا، بداو سكان المدينة يحسبو الحساب، انتابهم إحساس من أن هاد النظام الأمني والنظافة الكبيرة يقدر يتراجع في الايام الاخيرة من رمضان، وبالتالي عودة العديد من الظواهر والشوائب الأمنية لاجتياح شوارع كازا.