كود كازا ///
علمت “كود” ان الملك محمد السادس داز حدا العمارة اللي طاحت لخميس اللي فات حدا عمالة انفا قرب شارع مولاي يوسف فكازا.
وفق مصادر “كود” فسيدنا متبع هاد الموضوع وشاف بعينيه ديك لفضيحة اللي المسؤول عليها الاول هي السلطات. هاد الاخيرة ما راقبت والو. كوايرية قدام دايرين اشغال بلا رخصة
وفعلاقة بالموضوع علمت “كود” ان شركة “ليديك” متورطة فهاد الفيلم. اذ شوهدت طونوبيلة ديالهم جات لهاد العمارة باش دير اشغال. كيفاش يمكن لشي وحدين فهاد الشركة يخدمو فعمارة ما عندهاش رخصة. واخا هادو يقدرو يجيو بلى خبار شركتهم ولكن راهم كانو بلباسهم بطونوبيلتهم.
هاد “ليديك” قريبة تمشي فحالها فكازا. من يوليوز غادية تغبر وجهها ويطردو لفرانسيس وتعوضهم شركة يرأس مجلس ادارتها الوالي. واخا كان خاص يرأس مجلسها منتخب ماشي الداخلية
دابا خاص مالين الدار يدعيو الدولة ويدعيو ليديك وخاص القضاء يسرع التحقيق. كيفاش غير استامع لهادوك اللي دارو لفضيحة ويطلقهم.
