كود – تطوان //

عرفت منطقة كابو نيگرو، البارح، حضور ملكي مميز، بعدما خرج سيدنا محمد السادس ففسحة بحرية بالجيت سكي، الرياضة البحرية المفضلة عندو، وسط ترحيب كبير من المصطافين اللي كانوا فرحانين بظهور سيدنا.

الظهور ديال سيدنا فهاد البلاصة السياحية الزوينة زاد عطا نَفَس خاص للصيف بالشمال، لي كيعرف توافد عدد كبير من السياح المغاربة والمشاهير. من بين هاد الوجوه المعروفة، شافو المصطافين بالمركب السياحي مارينا سمير، كذلك ، ثلاثة من نجوم المنتخب الوطني المغربي لكرة القدم: أيوب الكعبي، يوسف النصيري، وعزالدين أوناحي، اللي جاو رفقة أفراد من عائلاتهم لقضاء عطلتهم فهاد المنتجع.

اللاعبين كيستمتعوا بشمس الصيف وهدوء البحر فمارينا سمير، اللي ولات واحد الوجهة المفضلة لنجوم الكرة هاد السنوات، فدلالة على اختيارهم للسياحة الداخلية والاستجمام فمدن المغرب الساحلية عوض السفر لوجهات خارجية.

وحتى الممثل المغربي محمد الشابي كان حاضر هو الآخر فنهار البارح فكابو نيگرو، فإشارة جديدة على أن نجوم الفن والرياضة فالمغرب بداو يختارو يقتاسمو صيفهم مع المغاربة فمناطقهم السياحية.

الجو العام فالشمال ها الصيف كيدوز فحفاوة وأمان وتنظيم جيد، وكيأكد أن السياحة الداخلية كترجع بقوة، بدعم مباشر من رموز البلاد ونجومها.

خاص غير وزير السياحة تلتقط الاشارة، وتروج للوجهات السياحية الداخلية بلاصت ما تمشي لزنزيبار وتصور وتروج ليها.