جواد الأنصاري- كود

—

نظام التعليم بالشكل اللي عليه حاليا فلمغرب ما يمكن ينتج لينا في الغالب الأعم سوى واحد المجتمع ديال كائنات لي كتكور وتعطي للعور ,اولا واحد القطيع ديال لبهايم لي كيستهلك فقط ما ينتجه الأخرون،

ولمدرسة تدارت اصلا غي باش تخرج لينا واحد المجموعة ديال الاغبياء لي كتجعل منهم واحد الخزان ديال معلومات ماعندهم تا غرض بها سوى باش تخدمهم الدولة من التمنية الصباح تالستة لعشية لا أقل ولا اكثر,

وكيفما قال برتراند راسل لا يولد البشر أغبياء بل جهلة ثم يجعلهم التعليم أغبياء

حيتاش لفكرة الاساسية لي كتقوم عليها أصلا منهجية التعليم عندنا هيا تأهليك لكي تكون فردا قابلا للإستغلال من طرف الدولة ،وبالتالي غادي تبقى كتحفظ وكتلقن داكشي لي بغات تقريك الدولة,

وماعمرك تعول على لقراية ديال لمدرسة بهاد الشكل أنها تجعل منك إنسان مثقف أو متفوق فكريا نهائيا ،غادي يجي واحد النهار لي تقدر تندم فيه مزيان على واحد الفترة من حياتك كان يجدر بك انك تعيشها بالشكل للي خصها تعاش ونتا ضيعتيها في السهير ولمجهودات والإكتئاب وعصير الدماغ ولحفاظة ولفقصة باش تشد لباك وتكمل قرايتك لي نتا اصلا غي مبززها عليك باش توظف وتحشرو في الدولة وفي الاخير غتصدق كالس علقالب وما شاد لا ديدي لا حب لملوك ,

را خيار لمدرسة نتا كفرد تقدر تلتجأ ليه فقط في حالة إنعدام البديل لي من خلالو تقدر تتعلم كيفاش تقرا وتكتب وتحسب وتستنتج والخ, أما في ظل توفر هادشي ديال الأنترنيت والتكلونوجيا فلست بحاجة إطلاقا باش تضيع حيز من عمرك فشي حاجة نتا غا تبززت عليك…او فرضوها عليك غا واليديك بهدف أنك تولي شي موظف ,او شي حاجة مهمة فلحياة,

دابا را ماشي شرط باش تولي شي حاجة مهمة فلحياة ,وتحقق التفوق ,تقرا بديك الصبغة البيروقراطية ,حيث يلا جينا نشوفو كيفاش مثلا ناس بحال بيل غيتس او جوبز أو زوكربرج لي قطعو قرايتهم لي كانت كتشكل بالنسبة ليهم عائق في وجه طموحهم ..

ولا على الصعيد الفكري والأدبي بحال عباس محمود العقاد او همنغواي أوسكوت فيتزجيرالد ودوستويفسكي ومحمد شكري لي اصبحوا كتاب وروائيون من طراز العالي دون أي تكوين اكاديمي غادي نوقفو على واحد الحقيقة مفادها أنه .ماعمر التفوق كان رهين بالتحصيل الاكاديمي بتاتا ,وهاد الجهابذة الأقحاح لا احد فيهم مثلا كان غيكون شي حاجة كن قرا داكشي لي بغات الدولة تقريه ،فمعظهم او كلهم تقريبا، كانو عصامين ,ودازو من واحد المخاض فكري واجتماعي عسير للغاية ،إن لم نقل مـأساوي …. ومن رحم ديك المأساة ولمجهودات برز الابداع …والتفوق

هادشي كان يحدث قديما شيئا ما, قبل إندلاع هادشي ديال لانترنيت ، حالياً في ظل هاد الزخم الوفير ديال المعلومات التي تتشاير هنا وهناك، المجال مفتوح لبنادم على مصراعيه يلا بغا يتعلم او يقرا فشي مجال لي هو كيبغيه ,دون لحاجة لحتى شي معلم او بروف . عندك غا حاسوب ولا غا تيليفون فيه الانترنيت ,راك تقدر تلقى فيه كاع دوك المعلومات لي عرفتهم لبشرية على مدار تاريخها كاملو , عن طريق مقالات او كتب او وثائقيات او لي عجبك ,

وما بقاتش تا شي حاجة لي صعبة المنال بحال شحال هادي، بحيث أنه كلشي لحمدو لله أصبح في المتناول، ….يُشترط فقط توفرك على قدر لا بأس به من المعرفة الأولية ديال كيفاش تقلب وفين, وأرا برع ,

وينعل بو شي باك