كود ـ فاس//

جولة صغيرة فالسوق الشعبي ديال عوينة الحجاج دارتها “كود” العشية ديال البارح الأحد 19 فبراير الجاري، السوق كان موجود فيه الخير ولكن الأثمنة باقا طالعا والبياعة خايفين من الجريحة لي جايا حيث ممكن عاود متوفرش ماطيشا ويتزاد ثمنها والناس اللي كانت كتعمر الصيكان غير العام الفايت فحال هاد الوقت ولات كتهز غير ميكة خفيفة كيديها الريح.

بخصوص الأثمنة، نبداو بماطيشا لي كيتراوح ثمنها بين 8 و10 دراهم لليكلو، أما الفلفلة فراه وصلات حتى هي لـ10 دراهم، والفلفلة المهلوكة المضروبة كدير 7 دراهم، بالطاطا ثمنها بين 5 و7 دراهم، الكورجيط (الكرعة الخضرا) 10 دراهم هزو ولا حطو.

أما فالديسير لقينا البنان بـ9 دراهم لليكلو، والليمون واصل 9 دراهم، الفريز وداكشي لاخر بلا مانسولو عليه. يمكن يقولو شي وحدين راه الأثمنة مزيانة، ولكن، كنقارنوها بالأثمنة للي عادة كتباع بها الخضرا والفواكه فهاد السوق، للي هو شعبي وكيكون رخيص بالمقارنة مع الأسواق الأخرى.