كود سبور //

فأكبر عراسية كروية فالعالم، بان اسم أيوب بوعدي كواحد من اكثر المواهب اللي تشهرات لبارح فماتش الأسود ضد البرازيل، اللاعب تزاد نهار 2 أكتوبر 2007 فمدينة سنليس القريبة من باريس، وسط عائلة مغربية أصولها من مدينة تزنيت، هاد الجذور المغربية ما كانتش غير جزء من الهوية ديالو، ولكن لعبات دور مهم فالمسار اللي اختارو من بعد.

البداية ديالو كانت مع نادي كريل الفرنسي، ومن بعد شد الطريق لأكاديمية ليل سنة 2021. من اللول بان مختلف على بزاف ديال اللاعبين فسنّو، مني المسؤولين فالنادي لاحظو فيه النضج والتوازن سوا فطريقة اللعب أو فالتعامل مع الضغط، وهاد الشي خلاه يطلع دغيا فالفئات السنية حتى وصل للفريق الأول.

بوعدي ما ركزش غير على الكورة، العزري خدا باك علمي بميزة مزيانة ومن بعد كمل القراية ديالو فالرياضيات، هاد التوفيق بين القراية والكورة خلاه كيلعب بشكل علمي وتقني.

بوعدي على بونت كان غادي يلعب مع فرنسا اللي لعب معاها فالفئات السنية، قبل ما يختار المغرب مؤخرا ويتالق معه فالماتش ضد البرازيل.

رئيس نادي ليل، أوليفيي ليتان، أكد باللي أيوب بوعدي مرتبط مع النادي بكونطرا حتى لـ2029. أما القيمة السوقية ديالو فوصلات دابا لـ50 مليون أورو.

فالماتش لبارح ضد البرازيل 2026، لعب أيوب بوعددي أول ماتش رسمي ليه مع المنتخب المغربي فالمونديال، ودار 60 باص من أصل 66 بنسبة دقة وصلت لـ91%، وقاس الكرة 86 مرة، ودار 3 مراوغات من أصل 5 المحاولات، وخذا تنقيط 6.5 على 10 حسب منصة Flash Score للإحصائيات. وبقى فالملعب حتى صفر الحكم.