محمد سقراط-كود///

ڤيديوات كثار ديال شي مستشار جماعي كيقلب الطبلة او مستشارة كتهرس الكرسي، او مضاربين بيناتهم ومهرسين گاع قاعة الاجتماعات أو شبعانين سبان في بعضياتهم، لدرجة أي واحد غادي يولي يتخايل قاعة الاجتماعات في الجماعة بحال شي حلبة ديال فنون القتال المختلطة، خاصهم غير قفص ويخدموا خماسة عند دانا وايت، وسط هاد الفوضى كتسمع أصوات كتطالب الشباب لي باغين التغيير أنهم يشاركوا في الانتخابات، ويدخلوا حتى هوما يقلبوا الطوابل ويتشايرو بالكراسة ويضاربوا على الهمزة، وطبعا يشاركوا في الانتخابات تحت نفس الأحزاب السياسية الحالية وفي ظل تفس القيادات، يعني دخل حتى نتا دير نفس داكشي لي خارج كتشكى منو وكتطالب بتغييرو.

أنا كنبغي غير نصوت في الانتخابات مكنلقى حتى شي حزب كيعبر حقا على توجهاتي السياسية ولي هي بسيطة وكثيرة، نضت صوت على الاحرار غير ضد في العدالة والتنمية وماشي حيت فاسدين او شفارة بل حيت حزب إسلامي فقط، طبعا الاحرار هو لي ربح عندنا وخدا عمادة المدينة، ولكن راه المرشح لي كان عندنا في الدائرة الجنوبية لفاس هو رشيد الفايق واحد من رموز الفساد الكبار، راه محكوم بطوالة ديال الحبس، العمدة البقالي ديال الاحرار حتى هو كل مرة كيتزگل من الحبس على نقشة، يعني مقابل أن الإسلاميين ميطلعوش صوت على الفساد شخصيا وعارفوا فساد ولكن مكانش بديل بالنسبة ليا، والموشكيل في النظام الانتخابي الحالي هو أي حزب واخا تكون القيادة ديالو معقولة وباغا تخدم المغرب، ولكن باش يقدر يربح الانتخابات ويشكل حكومة ضروري من انه يعتامد على الفاسدين باش يجمع اكبر عدد دالمقاعد بمن فيهم الإسلاميين.

بالنسبة ليا حكومة أخنوش من أحسن الحكومات لي دازو في تاريخ المغرب منجزات كبيرة تدارت في هاد العهد، ولكن على مستوى الجماعات والمناطق الهامشية والمشاكل المجالية، باقي المغرب كيدور في حلقة مفرغة سبابها الانتخابات والمنتخبين وطريقة تسييرهم للجماعات ديالهم، وطبعا دور الداخلية وسلطتها في هادشي، وكل مرة راه كيبان شي حراك جهوي سبابو مطالب بسيطة كان خاص تحقق في القرن الفايت، وللأسف عوض المواطنين يقصدو المنتخبين ونقر الجماعة او مقر الحزب لي كيسير الجماعة، كيقصدو العمالة وهادشي كيفقد الانتخابات قيمتها وأي أمل يرجى منها، سواء تدعموا الشباب او الشياب راه الموشكيل في المقادير ماشي في العطرية، خاص نظام أحزاب جديد غير معقد وقادر على بث روح جديدة في الحياة السياسية، أما في ظل النظام الحالي واخا يدخلوا الشباب للعمل السياسي العام اللول غادي يوليو شياب.