احمد الطيب الرباط ///

البارح لثلاث 25 يونيو 2024 كانت سهرة ثانية لام كلثوم بتقنية الهولوگرام فمسرح محمد الخامس فالرباط فاطار مهرجان “موازين”. سهرة تكلفات بيها “الخطوط الملكية المغربية” بعد سهرة اولى كانت تكفات بيها “اتصالات المغرب”. 

هاد السهرة نتجاتها “نيو ديمونسيون بروديكسيون” اللي كاينة فالامارات. كلفتها تقدر توصل حتى 60 الف دولار. 

سهرة البارح كانت ناحجة بزاف “وما عمرني شفت الصف على شي سهرة فمسرح محمد الخامس واصل حتى لوزارة الثقافة” كيقول سائق تطبيق “كريم”. الداخل ما قدراتش القاعة تستوعب الاعداد الكبيرة. كلشي جاي يكتاشف هاد التقنية. جاي يسمع اغاني “الست”.


فالاغاني الاولى بحال “انت عمري” و”سيرة الحب” كانت القاعة مندامجة. عايشة المود. كلشي صاقل. شي وحدين كانو كيحاولو يوثقو اللحظة بالتلفون. شي مسؤول عن انتاج السهرة كان كينبههم باش ما يديروش لفلاش. كاين اللي داير لايڤ كاع لصحابو او عائلتو. ولكن كلشي كان متخشع فحضرة “الست”. 

الجوق كان حقيقي اما الست فكانت بحال شي طيف نور كينزل من السما. التجربة جابت شخصيات كثيرة عزيز عليها الطرب. كان مولاي حفيظ العلمي وكان شكيب لعلج رئيس الباطرونا وكان عمر هلال السفير اللي عندو شعبية كبيرة عند لمغاربة……

لكن مع توالي الاغاني ديال ام كلثوم بدا هاداك الخشوع كيقل. عقلية اليوم صعيب تستمر فالخشوع لاغاني فنانة واخا تكون ام كلثوم. صعيب تصبر على اغنية طويلة بحال ناس زمان. واحد الستيني كان گالس قدامي. باش بدات الاغاني وهو ف”مود” الست بكل جوارحو. كتطلع فمقطع كيطلع وكيحرك يديه علاقة على هاد الانصهار. كتهبط كيمشي معاها. مجنون لاغاني هاد الفنانة. لكن غير بعد “سيرة الحب” الاغنية الثانية فهاد السهرة٬ وهو يقلبها هدرة مع صاحبو اللي جا معاه. بحال شي حد خرج من عالمها ورجع للواقع. كاين نسبة من الجمهور وقع ليها هاد الشي. سالات دهشة “الهولوگرام” والست وجاهم الملل. باش كان مع العشرة دالليل تقريبا ما كاينة حتى بلاصة فالمسرح٬ بعد شي ساعة بداو شي وحدين كيخرجو. هادو راها عزيزة عليهم ولكن طولات.
واش سهرة بحال هادي تستاهل 1800 درهم؟ ممكن ولكن مرة فالحياة. كان ممكن لمغاربة يعيشو كلهم هاد التجربة. كلشي كان واجد باش تنقل السهرة الاولى لام كلثوم اللي تنظمات الاحد فنفس المسرح على “دوزيم” لكن بسباب الحقوق ما تبثاتش كيف اكد ل”كود” مصدر من “موازين”. فهاد الفيلم ديال سهرات الهولوگرام كاين حقوق المؤلف: الملحن وكاتب الكلمات وكاين حقوق الصورة ديال ام كلثوم اللي عند عائلتها. ثم “موازين” شرات السهرة غير للجمهور اللي جا وخلص وما دخلوش البث التلفزيوني.