محمد سقراط-كود//
اللحم هاد العام واصل لأثمنة خيالية وكذاك ثمن الحولي دالعيد، والشناقة داخلين الصحاح وكيبتزو بنادم بالهدرة ومشعلين العافية في السوق، خصوصا الفيديوات لي كيوصلو من رحبة البهايم، ألفين درهم مابقاتش تجيب ليك حتى نعجة مهرارة لي بغا حولي دالعيد خاصو على الأقل خمسالاف درهم، لذا بانوا أصوات في المواقع الاجتماعية يدعون لإلغاء عيد الأضحى إسوة بالحسن الثاني لي لغاه جوج مرات من قبل، ولكن لظروف غير خارجة عن الإرادة داك الساعة راه كان جا جفاف قاصح ديال بصح، هاد العام واقعة كارثة حقيقية كاين السلعة ولكن السوق طالع بلا قياس وبلا معنى، لي كنت كنعرف شحال هادي هو أن الجفاف كيرخس الكسيبة حيت الفلاح معندو مايوكلها كيفضل يبيعها، وفاش كتكون الشتا والدنيا خضرة الكساب كيطلب الثمن وكيغلى حيت الكسيبة عندها ما تاكل وفين تسرح على ماتباع بالثمن باش بغى.
أثمنة الأضاحي هاد العام مبالغ فيها ولكن لي مامفهومش هو دعوات البعض لسيدنا يتدخل ويلغي العيد الكبير رحمة بالمواطنين الدراوش لي يقدرو مايعيدوش، علاش خاص يتدخل سيدنا وهو يمكن لأي واحد مابغاش يعيد أنه يقاطع هاد الشعيرة بشكل فردي حتى واحد ماغادي يشنق عليه يسولو فين حوليك علاش معيدتيش، واش فاش كيعكز شي واحد على الصلاة أو قطعها لأسباب عديدة كيخرج يطالب سيدنا يتدخل يلغي الصلاة وكذلك مع باقي العبادات، راه ساهلة جاك العيد غالي قاطعوا نتا ويقدر يديرها لاخر، أو تدعوا الناس لمقاطعته وتديرو حملات تعرفوا العالم على الموقف ديالكم، ولكن الإلغاء راه عندو شروط ذاتية وموضوعية خرى.
سنن وفرائض دينية كثيرة مكيديروهاش المغاربة ولكن مكيطالبوش سيدنا يلغيها، كل واحد كيقاطعها بشكل فردي مكاينش شي واحد مكيصليش وباغي سيدنا يلغي الصلاة ولكن في العيد الكبير بزاف كيبداو يطالبوا إلغائه من طرف سيدنا، بحال الى هوما ماقادرينش يقاطعوه بشكل فردي وخاصهم الدولة تفرض هاد الأمر على المغاربة كلهم، مابغيتيش تعيد ماتعيدش مكاينش شي نص قانوني كيعاقب واحد معيدش علاش خاص إلغاء العيد على المغاربة كلهم ومن بينهم لي معندوش موشكيل يشري حولي بمليون وجوج كاع، علاش هاد العقلية ديال الإلغاء بشكل جماعي، واحد ماعجبوش تيك توك وا بغينا الدولة تحضر تيك توك، بغينا الدولة تسد هادي تسد ديك، بينما في المجمل ديال هادشي كامل الأمر كيبقى عبارة على قرارات وسلوكات فردية وخاصها شجاعة لا يمتلكها من يطالبون بإلغاء أي حاجة ماقادرينش يديروها.
