كود – وكالات//

تخيّل وزارة الرقمنة ديالنا تطلق تطبيق ديال “الملاقاة” (Dating App) رسمي وموثق بالبطاقة الوطنية الإلكترونية؟ هادشي ماشي خيال علمي، هادي تجربة واقعية بانت فسنغافورة تحت اسم FirstDate، ومخصصة للموظفين العموميين لي مزال عزاب.

الفكرة ماشي غير “تشاتي ودوز الوقت”، وإنما كاينة خوارزمية ذكية كتجمع بين الناس على حساب القيم، الاهتمامات، والعادات ديالهم باش يلقاو شريك الحياة المناسب وتسهل عليهم خطوة الزواج.

وكالة الرقمنة الحكومية فسنغافورة (GovTech) دارت برنامج تجريبي سميتو FirstDate، هاد التطبيق ماشي بحال المنصات التجارية لي كنعرفو وإنما مبادرة رسمية موجهة حالياً للموظفين العموميين لي مزالين عزاب، ولي السن ديالهم ما بين 21 و35 عام.

الهدف من هادشي كامل هو مواجهة أزمة ديموغرافية حقيقية كتعيشها البلاد بسبب انخفاض معدلات المواليد وتأخر سن الزواج.

هاد المنصة كتخدم بطريقة علمية كتجمع بين المستخدمين بناءً على التوافق ف القيم، الاهتمامات، والعادات اليومية. ولأن الجدية هي كلشي، التطبيق كيفرض التسجيل إجباري بالهوية الرقمية الوطنية Singpass، يعني مكاينش حس للملفات المزيفة أو النصب.

وكثر من هادشي، التطبيق كيخدم بخوارزمية ذكية مستوحاة من بحث اقتصادي ربح جائزة نوبل، ولي مكتعطيكش آلاف البروفايلات تبقا تختار منهم وتمل، وكتقترح عليك شخص واحد مناسب بزاف ف كل دورة، وكتعطيكم 72 ساعة فقط باش تقررو واش كاين قبول متبادل أولا لا.