كود سبور//

عبر مروان سنادي مهاجم اتليتيك بيلباو الاسباني على الفرحة ديالو حيث جا للمنتخب الوطني المغربي لاول مرة، واكد ان الناخب الوطني وليد الركراكي عطاه الثقة وشجعو يلبس توني ليكيب ناسيونال، وانه غاينافس على بلاصتو مع لاعبين كان غير كايتفرج فيهم ودابا لقى راسو معهم فنفس الفريق.

وهضر مروان سنادي مول 22 عام، وقال فتصريح للموقع الرسمي للجامعة الملكية المغربية لكرة القدم: “كنت مع صحابي فاليونان كانتمتع بالعطلة وكنت فالشومبر مع نيكو، وملي سمعت سميتي حسيت بفرحة كبيرة، وغوت وفيقتو من النعاس، وبصراحة راني فرحان بزاف بهذه الفرصة”.

وكمل المهاجم الشاب وقال: “هذا كان حلم حياتي باش نلعب مع منتخب بلادي اللي كايخليني نحس بالتميز والمدرب (وليد الركراكي) ديما كايعطيني الثقة والطمئنينة والرغبة باش نلبس التوني وندافع عليه فالتيران”.

ووضح سنادي: “هادي عامين كنت كانتفرج فكاس العالم ودابا هاد اللاعبين ولاو زملاء ديالي فالفريق وهذا شرف كبير ليا، وعندي زملاء رائعين فالفريق عندهم امكانيات كبيرة، ولكن غانتنافسو على قبل مصلحة المنتخب وكانتمنى نعطي كل ما عندي للكيب ناسيونال”.