وكالات//

ربحات جبنة “غرويير سبيشال” اللي كتجي من مزرعة “فوردرفولتيغن” الجبلية اللي فالجنوب ديال برن، بجائزة أحسن جبن فالعالم لسنة 2025 فالدورة 37 ديال “جوائز الجبنة العالمية “World Cheese Awards، بعدما حصلات على 85 نقطة من لجنة التحكيم. هاد الجبن كيصايبوه من حليب البقر الطري وكيعتّقوه لأكثر من 18 شهر، وكيجمع بين نكهة غنيّة وقوام كريمي مميّز.

وجات فالمركز الثاني جبنة فرنسية كريمية مزوّقة بالزهور جايّة من إقليم الباسك، ومن بعد جا جبن “أبنزيلير” Appenzeller السويسري اللي معتّق لـ9 شهور. وتوزعات جوائز أخرى لأفضل أنواع الجبن ففئات مختلفة بحال: أحسن جبن خام، أحسن جبن ديال الماعز، أحسن جبن مدخّن، وزيد عليها جوائز “أحسن جبن” لكل دولة مشاركة.

وعرفات هاد التظاهرة مشاركة أكثر من 5,200 نوع ديال الجبن من 46 دولة، من بينها تقريباً الخمس ديال المشاركات جاو من سويسرا. وبدات المنافسة وسط روائح قوية ومختلفة، بين “جوارب مخمّجة” و”كلب مريض”، الشي اللي خلا التحدّي كبير للحواس قبل ما يبدا التذوّق.