وكالات//

وقعات فالهند واحد الحادثة اللي هزات القلوب، تم فيها إنقاذ فيل صغير عندو غير 15 يوم من وسط فيضانات قوية، من بعدما تخلات عليه الأم ديالو، وهادشي خلا المسؤولين يتدخلو باش يضمنو ليه البقاء ديالو على قيد الحياة.

بارفين كاسوان، اللي هو ضابط فدائرة الغابات الهندية (IFS)، شارك واحد الفيديو كيبان فيه كيفاش دارو عملية الإنقاذ، وبان فيه حتى الدًقة الكبيرة اللي تعاملُو بيها باش يخرجو الفيل من التيارات القوية ديال الماء.

وهاد المشهد خلا الناس يهضرو بزاف على سلوك الأمهات عند الفيلة، وكذلك على أهمية حماية الحياة البرية فحال هاد الكوارث الطبيعية.

وبما أن الفيل الصغير فهاذ السن كيكون معتمد كليا على الأم ديالو، المسؤولين داروه فشاحنة باش يبعدوه من الخطر، حيث أي غلطة كانت تقدر تهدد حياتو.

رفض الأم لولدها راه سلوك نادر، ولكن كيوقع فبعض الحالات، بحال إلى كانت الأم مرهقة، أو الصغير فيه شي مشكل صحي، أو كانت الأم بقات مدة طويلة مفارقة معاه، وهادشي كيخلي الفيل الصغير محروم من الرضاعة والدعم العاطفي اللي هو ضروري باش ينمو مزيان.