عمـر المزيـن – كود///

تفاصيل جديدة حصلت عليها “كود” في قضية اتهام مدير موقع إلكتروني وشي مصور متدرب بقناة وطنية معروفة في جريمة النصب والاحتيال.

المعلومات الجديدة التي حصلت عليها “كود” كتقول باللي عدد المشتبه فيهم ارتفع ووصل لثلاثة أشخاص، آخرهم شي موظف في المحكمة الابتدائية بمدينة مراكش الذي تقرر البحث معه فهاد القضية اللي مزال تقدر تطيح مسؤولين آخرين.

يشار إلى أن توقيف مدير هاد الموقع مع صاحبو المصور المتدرب والموظف اللي فالمحكمة جاء على خلفية شكاية تحطات بيهم عند النيابة العامة فمراكش.

هاد الشكاية قدماتها شي مرا وأكدت أنها تعرضت لجريمة النصب والاحتيال من طرف المشتبه فيهما اللي واعدوها باش يتدخلوا ليها فشي ملف قضائي كان معروض على غرفة الجنايات الاستئنافية، وكان ولدها متهم فيه.

مدير نشر هاد الموقع الإلكتروني واللي معاه مشاو بعيد فهاد القضية. فحسب مصادر “كود” فإنهم كانوا واعدو هاد السيدة باش يتدخلوا ليها لتخفيف حكم قضائي ابتدائي صدر في حق ابنها الذي تمت معاقبته بالسجن النافد لمدة 10 سنوات، لكن السيدة تفاجئت بتأييد الحكم في المرحلة الاستئنافية واكتشفت أنها راحت ضحية نصب واحتيال.