كود هناء ابو علي //

فاطمة الزهراء المنصوري الوزيرة، السيدة العمدة، ” سلطانة ” مراكش .منسقة القيادة الجماعية لحزب البام، لي ولات قيادة ثنائية، طردت أبو الغالي لي انتخبو المؤتمر من القيادة الجماعية، ماشي هذا هو الغريب فقط، حيت من الخيمة خرج مايل، لكن السبب هو العجيب.

فاطمة الزهراء دارت ثلاثة وضامة لأبو الغالي، حيت عندومشكل شخصي مع شي ركيزة في الحزب، حتى هو من موالين الشكارة.
مشكل شخصي معندو علاقة بتسيير الحزب، ولا بالشأن العام، بل فقط بشي بيعة وشرية بيناتهوم.
دابا، أش دخل الحزب فخلاف تجاري بين زوج راشدين، حتى إذا ما تفاهموش يمشيو للقضاء.

إذا فاطمة متعاطفة مع الطرف الثاني، أو مصلحتها معاه، كانت توكل مكتب المحاماة ديالها، ويرفع شكاية بأبو الغالي أمام القضاء، والتراكتور ما عندو باس.
المشكل دابا، أن هاد القرار فيه شبهة التأثير على القضاء، إذا وصلت الأمور للمحكمة.
وزيرة ورئيسة حزب ضحات بشريكها في قيادة الحزب، يعني فيها تلميح أن عندها معطيات خلاتها تمشي مع الطرف الثاني، إلا إذا كانت باغية الفروماج وثمن الفروماج.

حنا مغندخلوش في المساطر القانونية لي كتبين بلي هاد القرار معندو حتى مشروعية قانونية، فبيان أبو الغالي فصل في الأمر، وحنا ماشي منحازين ليه، حيت حتى هو ما وضحش شكون هادا لي عندو خلاف معاه وعلاش؟، مادام الأمر أصبح قضية رأي عام، ولكن في الجانب المسطري كان مقنع في توضيح أورجو لي حاصلة فيه المنصوري بالطايطاي.

على هاد القيبال خاص للا فاطمة تقلب على شي كوميسير، كيشبه للشخصية لي لعبها الفنان القدير سي محمد الخلفي في سلسلة “للا فاطمة”، ويجيب ليها دواصي المنتخبين والقيادات الوطنية والجهوية ديال الحزب، ولي لقات عندو مشكل شخصي مع شي حد، تجبد الكارط روج.

كاين عندها لي عليهوم قضايا ديال النفقة، كاين لي عندو سياقة في حالة سكر “عالمي” ماشي غير علني، كاين لي ما مخلصش تريتور حتى هو من الحزب، كاين لي حصلاتو مرتو كيشاطي مع البنات

القانون لي كينظم عمل المؤسسات المنتخبة، كيقول بلي العزل كيكون ملي الحكم كيكون نهائي في قضايا الفساد ونهب المال العام والارتشاء، وهي جرات على السيد حيت مضارب مع شي حد على شي صفقة،، واخا يجي شي حد شاكي، كانت تقول ليه: بيناتكوم أبيضاوة..

ولي كيخلي بنادم يغشل يدو من بحال هاد السياسيين، هو إذا كان ما قاله أبو الغالي صحيح، من أنها كلمة وزوج كتقول ليهوم: هادشي من الفوق.
كيفاش من الفوق؟
واش لي بغا يخربق شي حاجة، ينسبها للفوق.
الفوق أ الشريفة هو الملك.
سيدنا ماعندو بو الوقت لهاد التخربيق.

وسيدنا قالها أكثر من مرة: أنا ما مع حتى حزب، ولا دخل لي بتدبير أي حزب، وقالها بغضب بشكل صريح، وبشكل ضمني.
ها عار الله معطيو التيساع للفوق، حيت نتوم كلكم لاعبين لتحت.
مشكلة بنت الباشا المنصوري، أنها دخلت للسياسة معطلة، وغير بالصدفة، ومابغاتش تعلم، دخلت بعقلية القايد في زمن الاستعمار.
بلا ما يسول شي حد، ما موقف المهدي بنسعيد؟
المهدي صعيب يدير السياسة وهو مطوق بالفيدورات