كود – وكالات//

طلعات توندونس فتيك توك ويوتيوب مؤخرا سلسلة ديال “Fruit Love Island” لي هي سلسلة كتعتمد على الذكاء الاصطناعي باش تصاوب عالم كامل ديال الديسير منوضينها فواحد الجزيرة بيناتهم، الفكرة جاية من برامج بحال Love Island ، ولكن هنا الأبطال ماشي بشر، وإنما بنانة وفريزة وبتيخة وتفاحة، وسط فيلا استوائية فيها الحب، الغيرة، والخيانة بطريقة كوميدية.

وسط هاد العالم، كل فاكهة عندها شخصية البنانة “بانانيتو” حاس براسو وعينيه زايغين وكيدير المشاكل، الفريزة “ستروبرينا” ترونكيل ولكن كتسيف ملي كتكتشف الكذوب ولا الخيانة، والبتيخة “واترميلينا” هي البرگاݣة ديال الفيلا لي كتفرش الفضايح، أما التفاحة “أبل جاك” مغيارة ومكتبغيش شي حد ينافسها، الحوارات فالفيديوات فيهم الطنز وكتشبه بزاف دراما البشر ولكن بشكل كوميدي.

اللي خلا هاد المحتوى ينتاشر هو الطريقة اللي كيمزج بها الذكاء الاصطناعي بين الخيال والواقع، مني كيخلق مشاهد درامية بحال الخيانة ولا العصير مني كيتعصب وكيولي لونو حمر والنتيجة هي تجربة كوميدية كتأنسن الفواكه بطابع كوميدي جريئ .