سهام البارودي- كود//
بعض المغربيات الحنانات، باغين يردو لينا سكينة بنجلُّون أيقونة ديال الدفاع عن حقوق المرأة و فيمينيسم فالمغرب، بزز، داكشي علاش كانشوف شي منشورات هادي يوماين فالسوشل ميديا كاتعاود قصتها بواحد التصعيد روائي و بطريقة درامية فيها شي مصطلحات فحال ” حلات كرشها ربعة ديال المرات باش تولد ليه ربعة د الاولاد” ، “عاوناتو فخدمتو” ، “سمحات ليه ففلوسها…” السؤال ديال بسيط للناس لي كايكتبو هادشي، واش شي حد ضربها على يديها ؟ واش شي حد بزز عليها تخلي خدمتها فوزارة العدل و تتخلى على استقلاليتها المادية ؟ جاوبوني ! واش شي حد ضربها على يديها ؟
الجواب هوا لاّا
ايوا تتحمل مسؤوليتها فحالها فحال بزاف ديال المغربيات لي كايختارو يتخلاو على الاستقلالية المادية ديالهم و يجلسو فالدار يقابلو الراجل و الأولاد و يلعبو الدور ديال أميرة في بيت زوجي و نهار كايكتاب الفراق كاتلقى راسها شادة فالصبع الوسطاني. لاصحة نفسية لا صحة مادية لا حتى وزّة.
ثم آجيو مانحوروش الموضوع ؟ سكينة ماشي فيمينيست و ماشي ايقونة ديال الدفاع عن حقوق المرأة واش كاينة شي أيقونة غاتبقى لاصقة الراجل بديك الطريقة ومهوسة بيه داك الهوس كامل ؟
السيدة كان خاصها متابعة نفسية عاجلة ماشي لايفات ديال ثمنية د السوايع فتيكطوك مع الملولي و ميستر كبيدة، و دابا سكينة كاتخلص الأخطاء لي دارت و القضاء فاش كايقول كلمته راه ماكايبنيهاش على هضرة اللايفات و عواطف المتابعين ديال تيكطوك، القضاء كايبني الاحكام ديالو على الفاكتس و الفاكتس كايقولو أنها غالطة.
سكينة بنجلون لا بغيتو بزز تردوها ايقونة ديال شي حاجة فا غادي تكون ايقونة لغياب المتابعة النفسية فالمغرب و كيفاش الصحة النفسية ديال الانسان تقدر تدمر ليه حياتو و تخلي سميتو و كنيتو و قرايتو و خدمتو و عائلتو ماكايسواو والو قدام دماغ مزنزن و راس ماكايفكرش مزيان.
و بالنسبة للعيالات المطلقات ماغاديش نختارعو الرويضة كيما كايقولو فرانسيس
On ne va pas réinventer la roue
راه القضية باينة، لابغات المرا تكون مرتاحة فالزواج و مرتاحة فالطلاق فراه مامحتاجينش لسكينة بنجلون باش نفهموها، المرا خاصها تكون عندها الاستقلالية المادية ديالها و شي كونط عامر، هادشي عاد تقدري تفكري تولدي و ديري الاولاد مع شي حد، عارفين القوانين فالمغرب فصف شكون و عارفين لاطلقتو شنو ممكن يطرا و هاكاك كاتخلاو على استقلاليتكم المادية و كاتنوضو تولدو ولد و جوج و ثلاتة و ربعة و فاش كاتوقفو على الطلاق عاد كاديرو راسكم مصدومات؟
ايوا لگاو دابا
