كود علي الصافي العيون ///

علمت “كود” باللي حوالي 50 مغربي ومغربية عندهم ديور وفيلات وشقق فالصبليون جاتهم رسالة من مكتب الصرف. هاد الرسالة كيف حصلات “كود” على وحدة منها٬ قال مكتب الصرف باللي بناء على وثائق عندو تبين باللي عندك ممتلكات فالخارج بلا ترخيص من مكتب الصرف.

الرسالة فيها باللي قبل ما يتم البث فالملف٬ يمكن للمعني بالامر يتاصل بمكتب الصرف فاجل ما يفوتش 21 يوم باش يقدم تفسيرات ويدلي بوثائق على دوك الممتلكات.

وذكر مكتب الصرف فهاد الرسائل باللي رسلها ل50 شخص باللي ايلى كان المعني سوى وضعيتو فاطار التسوية الطوعية للوضعية الجبائية٬ يجيب ما يفيد.

وطلب مكتب الصرف من هادو يربطو الاتصال بمصالحو.

ووفق مصادر “كود” فهاد الحالات 50 غير دفعة اولى وغادية تكون دفعة ثانية يقدر تكون اللائحة طول غير على هادوك اللي عندهم ديور فالصبليون٬ وبللي غادية تشمل هاد الدفعة حتى لمغاربة اللي عندهم املاك فالامارات العربية المتحدة.

موضوع السكن فالصبليون حساس بزاف. كانت الدولة قبل سنوات عطات الاقامة الذهبية للي يشري عقارات. هاد القانون حيداتو الحكومة الاشتراكية الحالية قبل اسابيع٬ بل رئيس الحكومة بيدرو سانشيث صرح هاد السيمانا باللي اللي عندو عقارات من الاجانب غير المقيمين فالبلاد غادي تزاد عليهم الضرائب ب100 فالمائة.

وفق مصادر “كود” فالمصالح المغربية حصلات على هاد اللوائح ديال صحاب العقارات من الاتحاد الاوربي ومن اتفاقيات مع بعض دول الاتحاد بحال اسبانيا وباللي هاد الشي داخل فاطار محاربة تبييض الاموال والجريمة المنظمة العابرة للقارات وطبعا كل دولة كتستافد “ضريبيا” من هاد الاتفاقيات