كود احمد الطيب وسعاد زرار الرباط ///
“كود” عرفات مضاربة ناضت فندوة الرؤساء بمجلس المستشارين مع الوحدة ول نامس لثلاث 4 يونيو 2024. يومين والاتصالات مع رؤساء الفرق خاصة ديال نقابات العمال بثلاثة باش نجمعو اش وقع.
مصادر متطابقة اكدات ل”كود” لمضاربة. “كانت البونية وكان قبلو الشدان باليدين” اكد مصدر ل”كود”. مصدر اخر ل”كود” زاد باللي المعيور ما بقاش غير فالملة والدين٬ زادوه تحت السمطة بحال شي شمكارة ضاربين ماحيا مضروبة.
القصة كيف جمعاتها “كود” بدات باش دخل خليهن الگرش رئيس فريق الكونفدرالية الديموقراطية للشغل “سي دي تي” وهاجم رئيس مجلس المستشارين واللي فنفس الوقت زعيم نقابة الاتحاد العام للشغالين بالمغرب. الكرش وفق مصادر “كود” اتاهم ميارة بالديكتاتورية. قال ليه “انت ديكتاتوري. كتقمعنا. ما كتخليناش نعبرو”. دخل رئيس شي فريق دار فالكرش وقال ليه “انت اللي ضد القانون. ديما كدير نقطة نظام اكثر من مرة وكتفوت اللي كيعطيه ليك القانون.
القضية كبرات. الاصوات طلعات للسما. هنا تخربق كلشي “يوضح مصدر ثالث ل”كود” حضر لهاد لمطايفة. الكرش قال لميارة “وسير جيب لي البوليس” باش طلب منو رئيس مجلس المستشارين يسكت او يخرج.
دخل رئيس فريق التجمع الوطني للاحرار محمد البكوري. رد عليه خليهن الكرش. “هنا دازو من الهدرة لليدين” يشرح مصدر “كود”. “تشادو وفرقوهم اللي كانو حضرو. كان المعيور لمقود. الخايب. نحشم نقولو ليك” يوضح مصدر “كود” واخا قلنا ليه ما تحشمش غير قول ولكن ما بغاش. اكتفى غير ب”تحت السمطة”.
مصدر “كود” قال باللي الكرش هدد الباكوري وقال ليه “ايلي كنتي راجل اجي خرج برا. نتلاقاو برا”. لكن مصدر اخر ل”كود” شرح باللي غير سخونية الراس وصافي وباللي غير هدرة وكلام حيث تلاقاو برا وما وقع والو.
المهم كانت ندوة الرؤساء ونامس لثلاث فضيحة كبيرة. شوهة خايبة بزاف
واجيو نعاودو ليكم كيفاش بدأ هاد الشي اللي وقع فجلسة الأسئلة الشفوية لثلاث هو استمرار لما وقع في ندوة الرؤساء، كملها بلقشور رئيس جلسة الثلاثاء بتهنئة فريق الوزير بنسعيد ديال يعقوب المنصور، والمستشارة عن الكنفدرالية الديمقراطية للشغل فاطمة زوكاغ كانت بغات نقطة نظام باش تنبه رئيس الجلسة بلقشور بخرقه للنظام الداخلي بهاد التهنئة للي استغل فيها تواجده فرئاسة باش يقدم تهنئة للوزير.
قصة الصداع، بدات هادي أكثر من ثلاثة أسابيع ومجلس المستشارين كيعيش أزمة كبيرة بين المعارضة ومكتب المجلس بسبب الوضعية الكارثية فكليات الطب للي مازال الطلبة فيها مقاطعين الدراسة والامتحانات بسبب قرارات الوزير المسؤول عبد اللطيف ميراوي.
جذور الأزمة كترجع للوقت للي قدمات فيه مجموعة الكونفدرالية الديمقراطية للشغل طلب لرئيس المجلس من أجل تناول الكلمة في ختام الجلسة حول موضوع طارئ طبقا لمقتضيات المادة 168 من النظام الداخلي للمجلس، يتعلق بالأوضاع في كليات الطب للي كتعيش احتقان كبير.
النعمة ميارة، بعدما تلقى طلب الكونفدرالية، أدرج الطلب في جدول أعمال المكتب وتمت دراسته وأرسل للحكومة لاتخاذ المتعين.
الحكومة قررت تتفاعل مع مقترح مجموعة الكونفدرالية لكن بشرط أن تؤجل المناقشة فيه لجلسات لاحقة. هنا، وفالجلسة العامة، أمين المجلس ما قراش موضوع طلب الكونفدرالية واكتفى فقط بإخبار المجلس بقرار الحكومة. هاد الشي أدى إلى مناوشات بين رئيس الجلسة محمد حنين، عن التجمع الوطني للأحرار، ومنسق مجموعة الكونفدرالية خليهن لكرش للي خدا نقطة نظام واعتبر بللي كاين خرق للنظام الداخلي للمجلس بعدما لم يشر الأمين إلى موضوع الطلب.
فالجلسة الموالية لمجلس المستشارين، الأسبوع الماضي، نفس الموضوع غادي يتطرح فإطار نقطة نظام دارتها المستشارة فاطمة زوكاغ للي اتهمت أمين المجلس جواد الهلالي بللي ما كانش “أمين” في قراءة قرار المكتب وللي تنشر فالنشرة الداخلية للمجلس ، وهو ما أغضب رئيس الجلسة فؤاد القادري، من حزب الاستقلال، للي فاجأ الجميع عندما قال بللي هاد الموضوع تقرر أنه يتعرض على ندوة الرؤساء باش تحسم فيه.
لكن متخصصين في الشأن البرلماني والقانون الدستوري قالو بللي قرار إحالة هاد الموضوع من قبل مكتب مجلس المستشارين على ندوة الرؤساء مخالف للنظام الداخلي للمجلس وللي حدد اختصاصات ندوة الرؤساء فقط في تنظيم المناقشة العامة حول النصوص المعروضة على المجلس، وليس مناقشة والبث في تأويلات مختلفة لمواد النظام الداخلي.
مجموعة الكونفدرالية الديمقراطية للشغل تتمسك بما نشر في النشرة الداخلية للمجلس بخصوص قرارات إجتماع مكتب المجلس يوم الإثنين 27 مايو 2024، وللي تنشر فيه طلب الكونفدرالية بموضوعه وهذا دليل بخرق رئيس الجلسة وأمين المجلس للنظام الداخلي، وفهادي الكونفدرالية عندها الحق ومدعومة من قبل فرق المعارضة. أما موقف بعض المستشارين من التجمع الوطني للأحرار وحزب الاستقلال للي يبدو أن عندهم موقف معين من مجموعة الكونفدرالية الديمقراطية للشغل، فيبدو أنه مرتبك وماعندوش أساس فالنظام الداخلي.
أعضاء مجموعة الكونفدرالية كيقولو بللي هناك إرادة لبعض أعضاء مكتب مجلس المستشارين لإفراغ النظام الداخلي للمجلس من الصلاحيات الرقابية المخولة لمجلس المستشارين بشكل عام، وللمعارضة بشكل خاص، وهاد الشي كيمس بالدستور.
فهاد المعركة كلها، مازال الوزير مصطفى بايطاس، الوزير المكلف بالعلاقات مع البرلمان، ساكت وجالس كيتفرج. وخارج السياق. يمكن مقادرش يضبط العلاقات مع البرلمان وابان عن ضعف كبير.
