سعيد المزابي وهناء ابو علي – كود كازا //

فين وصل مشروع المحج الملكي فكازا اللي بدا من التسعينات اي من ايام الحسن الثاني ومازال حاصل؟ قبل الجواب على هاد السؤال٬ اشناهو. هادا الطول ديالو حوالي كيلومتر ونص وعرضو تقريبا فحدود 50 مترو. غادي يربط من ريجنسي فجهة بوركون وفين كانو التيرمينوس ديال الطاك ايام زمان وبين مسجد الحسن الثاني.

مشروع المحج الملكي رجعات فيه الروح قبل اشهر وصافي. دابا ممكن يدار قبل عام او عامين شرط يبدلو الشركة المكلفة بالتدبير او يجيبو ليها التمويل الكافي ويكملو التريبات وايواء السكان او تعويضهم.

حسب معطيات حصرية عند “كود” فلحد الان تريبات 896 دار كانت ساكنة فيها 5400 اسرة. كلهم حسب مصدر “كود” “تنقلو”. حسب مصادر “كود” ديما٬ تنقل الحالات لكثيرة، ودابا باقية 1104 دار ساكنة فيها 3100 اسرة.

طبعا باش دخل فمسطرة الترياب هادا فيلم بوحدو. المشكلة اللي خاصها الحل فهاد الارقام هو التحيين. راه هاد الارقام ديال باللي لقاو 8500 اسرة معنية فقط بالمحج الملكي ماشي بالمشاريع اللي غادية تكون محيطة بالمشروع٬ دارت من قبل الوكالة الحضرية فكازا بناء على احصائيات 2012. وا 13 سنة اكيد غادية تزاد عائلات هي. كاينة حصلة اخرى. هاد الديور فيها اللي عندهم التيتر ومحفظة وكاين اللي كاري. خاص كل واحد حل مختالف. حسب مصادر “كود” فثمن التعويض على الديور ماشي كثير. فحدود 10 و13 مليون سنتيم. لصحاب لكرا مزيان ولكن مالين الديور ايلى كان نفس التعويض راه قليل بزاف

وهنا ديما غادي يبقى مشكلة ودابا حاصلين فيها. وهي ان الشركة للي دارت باش تشرف على المحج الملكي هي “سوناداك”. كان من مهامها: دير نزع الملكية وتنجز هاد المشروع. لكن هاد الشركة ما بقاش عندها لفلوس وعليها حاصلين دابا.

والحلول الممكنة حسب متتبعين لهاد الملف ل”كود” هو اما يدخلو “ادماج سكن” للخدمة وتعوض “سوناداك”. هاد الشركة ديال “ادماج سكن” راها مكلفة تمويل التريباب وطبعا البيوت الايلة للسقوط.

الحصلة كيف قلنا هو كثرة المتدخلين دابا. خاص اعدام “سوناداك” يوكد مصدر “كود” ودار مؤسسة وحدة بمدير واحد يجمع بين كاع المتدخلين من مجلس بلدي لكازا وجماعة انفا وعمالة انفا وولاية كازا والوكالة الحضرية. هاد المدير ديال الشركة اللي ممكن تخلق غادي يحتاج وفق مصادر “كود”٬ 535 مليون درهم فيها 40 مليون درهم غير ديال الترياب.

يعني فيلم “شانزيليزي البيضاوي” يقدر يطول شوية. دابا هاد ليام بدات الخدمة ديال التريات كتعطل. يعني راه ممكن بيضاوا يتسناو بزاف باش يتساراو فهاد المحج