كود هناء ابو علي ///

البارح لثلاث 8 نونبر 2022 خرجات صور فيها الممون الشهير رحال فشرم الشيخ فقمة المناخ =كوب 27 بمصر=. الجهة المنظمة الامم المتحدة مع الدولة المستضيفة مصر طلبو رحال فالدقيقة تسعين باش ينقد الموقف.

وفق ما علمته “كود” من المنظمين فالاتصال كان تقريبا 15 يوم مع هاد الشركة العالمية فدومينها. فهاد الفترة لقصيرة كان على الشركة ماشي غير توجد ليموني وتبريباري الاستقبالات والماكلة ديال المؤتمر والتفاصيل الصغيرة كل واحد واش كيعجبو واش خاصو ياكل٬ بل لمغاربة اللي غاديين يمشيو يخدمو.

كان خاص الشركة وفق مصادر “كود” توجد تذاكر السفر ل300 شخص فيهم كلشي من سرباية وطباخة ومشرفين على اللوجستيك وادارة هاد الناس… تحداو هاد الصعوبة ونجحو يوصلو كلشي لشرم الشيخ. شي على باريس وشي على دول اخرى.

الامم المتحدة كانت شافت خدمة هاد العلامة ف”كوب 25″ بمراكش وعجباتها الخدمة. هاد الشي علاش٬ يضيف مصدر “كود”٬ طلبو يخدمو معاهم.

فهاد المؤتمر نجحات هاد العلامة فارضاء رؤساء الدول والوفود. كلشي ماشي غير بقى على خاطرو بل عجبو بزاف اللي تقدم ليه. كانو دي موني مختالفين. طبعا فيهم اللمسة المغربية فيهم الذوق المغربي من غير اتاي والحلوة اللي كانت ديما دايرة بين الرؤساء والملوك